Sol kúni Nıkıta erterek jatyp qaldy. Nege ekeni belgisiz, tún ortasy aýa shoshyp oıandy. Ornynan turǵysy kelgenimen, aıaq-qoly zil batpan, kótertpeıdi. Basy aýyryp, kózi qaraýyta bastaǵanyn, júregi loqsyǵanyn sezdi. Ál-dármeni quryp, belgisiz bir kúsh túpsiz tuńǵıyqqa súırelep bara jatqandaı. Maýjyrap, uıqysy kelgendeı kerenaý kúıge ene beredi. Tistenip alyp, sońǵy kúsh-qaıratyn boıyna jınaǵan kúıi ornyna turmaqqa umtyldy. Úıdiń ishi kókala tútin. О́ń men tústiń arasynda júrip, aldymen shyrt uıqyda jatqan atasy men ákesin julqylady. Tirliktiń nyshany baıqalmaıdy. Qatty shoshyǵandyqtan ba, jyndy adam qusap, eki qolyn erbeńdete berdi. Odan jan ushyryp, ájesi men anasyn julmalady. Tas músin syqyldy. Ne isterin bilmeı dalaǵa atyp shyqty. Aınala tas qarańǵy. Taza aýa tynysyn sál keńitip, óz-ózine kelgendeı boldy. Kórshi úıde turatyn jamaǵaıyny esine sap ete qaldy. Júgirip sonda bardy. Esikti, terezeni urǵylap júrip oıatty. Ondaǵylar bizge qatysy joq máselelerge aralastyrmańdar degendeı keıip tanytyp, jyly tósekterine oralǵansha asyqty. Úıge qaıta kirgeni sol, qoıý tútin qolqany qaýyp, basy aınalyp, kózi qaraýytyp ketti. Áýpirimdep júrip, anasynyń uıaly telefonyn taýyp aldy. Jedel járdem dıspetcherine qońyraýlatyp, jaǵdaıdy baıandaýǵa ǵana shamasy jetti… О́rt sóndirý qyzmetkerleri aıtylǵan mekenjaıǵa jedel jetip, zardap shegýshilerdi shuǵyl túrde aýrýhanaǵa jetkizdi. Nıkıta esin birneshe kúnnen keıin jıdy. Qyzmettik tekserý barysynda pesh jaǵýdyń qaýipsizdik erejelerin saqtamaý saldarynan ýly gaz bólinip, tutas otbasy ıis tıip, ýlanǵany belgili boldy. Jaqynda oblystyq tótenshe jaǵdaılar departamentiniń basshylyǵy №44 mektepke arnaıy kelip, tutas otbasyna ómir syılaǵan erjúrek oqýshyny alǵys hatpen marapattap, uıaly telefondy syıǵa tartty. Bizdiń qyzmetke qıyn jaǵdaıda eshteńeden taısalmaıtyn, qolushyn berýge árkez daıar óziń sııaqty batyl adamdar qajet. Mektep bitirgennen keıin qutqarýshy bolamyn deseń, qushaq jaıa qarsy alamyz, dedi departament bastyǵynyń orynbasary Nurlan Atyǵaev saltanatty jıynda. Nıkıta Kýkýshkın úshin eń qymbaty – týǵan-týystarynyń amandyǵy. Qarshadaı balanyń kóńil túkpirinde qatarymnan kem qalmaı ósip-jetilsem, qabaǵymdy kirbiń shalmasa degen asyl arman menmundalaıdy.
О́mir ESQALI, «Egemen Qazaqstan»
PETROPAVL