Bul týraly búgin QR Parlamenti Senatynyń tóraǵasy Qasym-Jomart Toqaev parlamenttik tyńdaý barysynda aıtty. Senat tóraǵasynyń aıtýynsha, bıýdjettiń munaı baǵasyna táýeldiligin tómendetip, bıýdjet shyǵystarynyń tıimdiligin arttyrýǵa basymdyq berý kerek. Sonymen qatar salyqtyq ákimshilendirýdi jaqsartqan jón.
«Qarjyny mańyzdy salalarǵa ǵana bólý qajet, ıaǵnı shyǵystardy birshama azaıtý kerek. Imıdjdik sıpattaǵy shyǵyny kóp jobalarǵa qarjy bólýdi toqtatýdy da qarastyran jón. Sebebi, keıingi jyldary bıýdjettiń túsiminen góri shyǵysy joǵary qarqynmen artyp keledi», dedi Toqaev. Sonymen qatar ol Ulttyq kompanııalar túsim ákelýdiń ornyna tutyný jaǵyn arttyrýǵa beıim ekenin atap ótti.
«Memleket basshysy atap kórsetkendeı, bıýdjettik úderis qarajatty barynsha únemdeý kózqarasymen júrgizilip, barlyq sheshimder uzaq merzimge arnalǵan múddelerdiń turǵysynan ekonomıkalyq pragmatızmge negizdele otyryp qabyldanýy tıis. Úkimet bólingen qarajattyń ıgerilmeı qalýyna jol bermeý maqsatynda eleýli jumys júrgizýi kerek. Bıýdjettiń tapshylyǵy ahýalynda qarajattyń turaqty túrde ıgerilmeýi jaǵdaılaryna múldem jol berilmeýi qajet. Bizdiń aldymyzda bıýdjetti josparlaý úderisin arttyrý jónindegi naqty sharalardy toqtatpaı, jalǵastyrý mindeti tur», — dedi Toqaev.