Ádettegiden bólek, oblys ortalyǵyndaǵy bıylǵy merekelik sharalar jańa alańda – saıabaqta ótpek. Onda úlken sahna ornatylyp, kórermenderge arnalǵan oryndyqtar qoıylatyn bolady.
Ulystyń uly kúnin merekeleýge oblystyq bıýdjetten, ıaǵnı mádenıet, muraǵattar jáne qujattama basqarmasynan 8 mln teńge bólinip otyr. Atalmysh is-sharany uıymdastyrýǵa Almaty men Astanadan arnaıy mamandar shaqyrylǵan. Qazirgi kezde daıyndyq jumystary júrip jatyr.
«Dástúr boıynsha Naýryz keńinen toılanady. Teatrlandyrylǵan qoıylym mıýzıkl stılinde ótedi. Bul Kóktemniń kelýi men dúnıeniń jaralýy, qazaq eliniń qurylýy týraly ertegi. Sý, aýa, ot – bári qosylady», – deıdi almatylyq buqaralyq qoıylymdardyń jıyntyq qoıýshy-rejısseri Aspet Jılkına.
Kóriniske 600-den astam adam qatyspaq. Onyń ishinde, oqýshylar men jas ártister, qaraǵandylyq shyǵarmashylyq ujymdar, teatr ónerpazdary da bar. Arqa óńiri bolǵandyqtan bı men ánge kóp basymdyq berilgen. Mátinder men mýzyka arnaıy mıýzıkl úshin jazylǵan.
Bılerdiń horeograf-rejısseri Almatydan shaqyrylyp otyr. Bıshilerdi mıýzıklǵa Abaı atyndaǵy qazaq ulttyq pedagogıka ýnıversıtetiniń horeografııa kafedrasynyń professory Almat Qurmajanov daıyndap jatyr.
Qoıylym barysynda arnaıy effektiler qoldanylmaq. Basty jańalyqtardyń biri – túrli-tústi tútindi salıýt bolǵaly tur.
Mıras ASAN, «Egemen Qazaqstan»