Alǵash bolyp sharshy alańǵa 52 kılo salmaqta «arlandardyń» kapıtany Oljas Sáttibaev pen reseılik Vıacheslav Tashkaraev shyqty. Jekpe-jek bastala sala qarsylasyn soqqynyń astyna alǵan jerlesimiz eki raýndtyń kórsetkishi boıynsha alda boldy. Alaıda, kezekti bir sátte Tashkaraevtyń qabaǵy jarylyp, dárigerler kezdesýdi ári qaraı jalǵastyrýyna múmkindik bermedi. Osylaısha, Sáttibaev upaı sanymen jeńiske jetti.
Kelesi 60 kıloda jerlesimiz Zákir Safıýllın men Artýr Subhanqulov judyryqtasty. Jeńisti joldy jalǵastyrý úshin Safıýllın baryn saldy. Reseıliktiń adymyn ashtyrmady, bet-aýyzyn qan-josa qyldy. Subhanqulov ara-tura shabýyldamaq bolǵan, biraq onysynan túk shyqpady. Nátıjesinde, Zakır Safıýllın basym tústi.
Úshinshi bolyp rıngke 69 kılo salmaqta Aslanbek Shymbergenov pen reseılik Shahabas Mahmudov shyqty. Bastapqyda Mahmudovtyń soqqylarynan abdyrap qalǵanmen, Aslanbek kóp uzamaı bar ónerin ortaǵa saldy. Sharshy alańda tolyǵymen ústemdik qurǵan ol jekpe-jek nátıjesin 3:0-ge jetkizdi.
81 kıloda synǵa túsken Arman Rysbek úshin jekpe-jek ońaı bolmady. Sebebi, otandasymyz álem chempıonatynyń júldegeri Pavel Sılıagınmen qolǵap túıistirgen edi. Tájirıbesi mol reseılik boksshy qarsylasyn nokaýtqa túsirýdi oılaǵanymen, onysynan túk shyqpady. Qaıta jankúıerlerinen rýhtanǵan Armannyń mysy basty. Kezekti sátterdiń birinde Pavel Sılıagın tipti nokdaýn da alyp qaldy. Bes raýndtyń qorytyndysy boıynsha Arman Rysbek jeńiske jetti.
Sońǵy bolyp asa aýyr salmaqtaǵy boksshylar shyqty. «Arlandardyń» debıýtanty Oljas Boqaev tájirıbeli Magomed Omarovpen judyryqtasty. Oljas ta jeńiske jetý úshin aıanyp qalmady. Shabýylǵa ózi shyǵyp, qarsylasyn qyspaqqa alýmen boldy. Degenmen, bul synda Omarovtyń mereıi ústem bolyp, «Patriot boxing team» komandasynyń alǵashqy jeńisin enshiledi. Qorytyndy esep – 4:1.
Osylaısha, «Astana Arlans» komandasy 12 upaımen týrnırdiń pleı-off kezeńine joldama aldy. 1 sáýir kúni olar О́zbekstannyń «Uzbek Tigers» ujymymen synǵa túsedi.
Aıan ÁBDÝÁLI,
«Egemen Qazaqstan»