«Talaby joǵary mamandardyń birimin. Komandamnyń joǵary nátıje kórsetkenin qalaımyn. Izmırde júrgende jýrnalıster meni dıktator dep esepteıtin. Ekinshi, úshinshi lıgadaǵy ujymdardyń órleýi úshin barymdy saldym. Al qazir búldirshindermen jumys istep júrmin», – dedi Hıdır Akbash.
«Fýtbol dese barymdy berýge daıynmyn. Osy sport túrin meńgerý úshin biraz eldi araladym. Qazaqstanǵa kelýimniń birden bir sebebi – fýtboldy damytý. Deńgeıi tómen klýbtardy alǵa qaraı jetelegim keledi. Onyń ústine jarym da osy eldiń azamatshasy», – dedi ol.
Qazaqstanǵa baǵyn synap kelgen legıoner fýtbolshylardyń az bolmaǵany belgili. Olardyń qatarynda bapkerler de joq emes. О́kinishke oraı, qajetti nátıjege jete almaı ketkenderi kóp. Al Hıdır Akbashtyń qazaq fýtbolyn damytýǵa qanshalyqty kómegi tıe qoıar eken?
«Bul jerde mentalıtetti de eskerý kerek degen oıdamyn. Ultym – túrik, Eýropanyń birneshe elinde turdym. Al Qazaqstanǵa kóbine nemis, golland jattyqtyrýshylary kelgen. Bálkim, osydan baryp túsinispeýshilik bolǵan shyǵar. Al maǵan qazaq halqynyń orny bólek. Sondaı-aq, meniń tájirıbem de kóp. Álemdegi eń myqty mektepti bitirip, belgili bapkerlermen jumys istedim», – dedi Hıdır Akbash.
«Osyǵan deıin Qazaqstandaǵy ortasha deńgeıli komandalardyń birin jattyqtyrý týraly usynys túsken. Biraq ol kezde «Dııarbakyrdyń» bapkeri edim. Sondyqtan bas tartýyma týra keldi. Al qazir qandaı usynys bolsa da qarastyrýǵa daıynmyn. Qazaq fýtbolyn damytý úshin qolymnan kelgendi aıanyp qalmaspyn», – dedi ol.
Elimizge kelgen sheteldik mamandar meılinshe kóbirek jalaqy alǵanyn qalaıdy. Al Hıdır Akbashtyń jalaqysy qansha bolmaq?
«Qazaqstannyń kez kelgen jerinde, qaı komandamen bolsyn qyzmet etýge daıynmyn. Tipti, birinshi lıganyń klýbtary bolsa da qarsy emespin. Al qarjy máselesine kelsek, ony usynys jasaıtyn tarappen jeke otyryp talqylaǵym keledi», – dedi.