Máselen, bıylǵy «Qazaqstannyń Úshinshi jańǵyrýy: jahandyq básekege qabilettilik» Joldaýy eldegi saıası júıeni jetildirýge, adamı kapıtaldyń sapasyn joǵarylatýǵa, otandyq IT-salany damytýǵa, jahandyq ekonomıkaǵa básekelestikti arttyrýǵa, jańa ındýstrııalardy odan ári ilgeriletýge negiz qalap otyr. Álemdi sharpyǵan ekonomıkalyq daǵdarysqa qaramastan, halyqty áleýmettik qorǵaý úderisteriniń jalǵasatyny da salıqaly saıasat pen utymdy baǵdarlamalardyń oljasy ekeni anyq.
Prezıdenttiń Joldaýynda adamı kapıtal sapasyn jaqsartý men balabaqshalarǵa qatysty kásipkerlikti damytýda memleket-jekemenshik seriktestigi aıasyn keńeıtýge zor múmkindik berilgendigine aıryqsha toqtalyp ótkim keledi. Elimizde demografııalyq ahýaldyń jyldan jylǵa jaqsaryp kele jatqanyn eskersek, balabaqsha máselesi árdaıym ózekti bolyp qala bermek.
«Eń aldymen, bilim berý júıesiniń róli ózgerýi tıis. Bizdiń mindetimiz – bilim berýdi ekonomıkalyq ósýdiń jańa modeliniń ortalyq býynyna aınaldyrý. Oqytý baǵdarlamalaryn synı oılaý qabiletin jáne óz betimen izdený daǵdylaryn damytýǵa baǵyttaý qajet», dep Elbasy Nursultan Nazarbaev atap ótkendeı, keleshek urpaqtyń aldynda turǵan keleli mindetterdi tııanaqty oryndaý úshin olardy eń birinshi kezekte sapaly bilimmen sýsyndatýymyz kerek. Adamı kapıtal sapasynyń basty kórsetkishi ustaz ben bolashaq urpaqtyń bilim deńgeıinen aıqyn ańǵarylady.
«Qala men aýyl mektepteri arasyndaǵy bilim berý sapasynyń alshaqtyǵyn azaıtý qajet», degen Elbasynyń sózi qoınaýy qut-berekege toly aýyldyń tynys-tirshiligine, ondaǵy mektepterdiń jańa kelbetine, jalpy alǵanda, urpaqtyń laıyqty ári sapaly bilim alýyna zor múmkindik beretini anyq. Memleket basshysy óz Joldaýynda «Mektepterdiń jáne muǵalimderdiń deńgeıi, ásirese, aýyl men qalada ártúrli. Bilikti pedagogterdiń jetispeý problemasy bar», dep atap kórsetti. Budan biz aldymyzda aýyl muǵalimderiniń básekege qabilettiligin arttyrý mindeti turǵanyn ańǵara alamyz.
Bıyldan bastap jalpyǵa birdeı tegin kásiptik bilim berý jobasy júzege asyrylýda. Bul – óte oryndy ári der kezinde qolǵa alynǵan bastama. Suranysy joǵary, asa qajet mamandardy oqytyp, qaıta daıyndaý isine erekshe basymdyq beriletin bolsa, el ekonomıkasynyń damýyna oń yqpalyn tıgizbeı qoımaıdy. Osy oraıda aldymen elimizde tapshy mamandyqtar boıynsha mamandardy daıyndaýda jergilikti bılik kásiporyndar jáne kásipkerlermen birlesken is-qımyl jasaýy – kezek kúttirmeıtin másele. Áleýmettik ınfraqurylym nysandaryna jatatyn bilim berý salasyna qatysty ózekti máseleler ońtaıly sheshim tapsa, belgilengen mindetter tııanaqty oryndalyp, ortaq iste jaýapkershilik arttyrylsa, birlik pen tatýlyqty tý etken halqymyzdyń almaıtyn asýy bolmaıdy.
«Memleket qurý jolynda teńdessiz, mol tájirıbe jınap, jańa kezeńge qadam basyp otyrmyz. Aldymyzda qandaı qıyndyqtar kezdesse de, olardy eńsere alatynymyzǵa senimdimin. Bizdiń basty kúshimiz – birlikte», dep aıtylǵan Joldaýdyń sońyndaǵy osy bir aýyz sóz beıbitshilik pen dostyqtyń, aýyzbirshilik pen tatýlyqtyń Táýelsiz Qazaqstanǵa alyp kelgen sharapatyn uqtyra túsedi. Eldiń baıandy bolashaǵy men erteńi úshin barlyq qazaqstandyq judyryqtaı jumylyp qyzmet atqarsa, eldiń buǵanasy odan saıyn qataıa beretini anyq.
«Qazaqstandaǵy salalyq bilim jáne ǵylym qyzmetkerleri kásiptik odaǵy» QB sala qyzmetkerleriniń áleýmettik-ekonomıkalyq quqyqtaryn qorǵaı otyryp, týyndaǵan eńbek daýlaryn der kezinde eńbek ujymdarynda sheshýge, osylaısha el birligi men tynyshtyǵyn saqtaýǵa basa nazar aýdaryp keledi.
Memleketti jańǵyrtý basymdyqtary bilim berý salasyna artylǵan úmit pen senimniń, jaýapkershiliktiń talaby joǵary ekenin bildiredi. El údesinen shyǵý jolynda Qazaqstandaǵy eń iri qoǵamdyq uıym retinde «Qazaqstandaǵy salalyq bilim jáne ǵylym qyzmetkerleri kásiptik odaǵy» QB óziniń áleýmettik áriptesi bolyp tabylatyn Bilim jáne ǵylym mınıstrligimen birlese otyryp, halyqtyń bilim sapasyn kóterý, ustazdardyń mártebesin arttyrý syndy kókeıkesti máselelerdiń sheshimin izdestirý jolynda eńbek etýde.
Memlekettiń qýattylyǵy halyqtyń bilim deńgeıi men densaýlyq jaǵdaıyna baılanysty ólshenedi. Ǵalymdy da, ınjenerdi de, dárigerdi de alǵashqy kezeńde bilim nárimen sýsyndatqan ustazdar qaýymy ekenin eshkim joqqa shyǵara almaıdy. Adamı kapıtaldyń sapasyn arttyrýdyń negizgi bastaýy da bilim berý isiniń negizinde jatqanyna salmaqty túrde nazar aýdarýymyz kerek. Bul sapa kórsetkishiniń artýy tikeleı ustazdar qyzmetimen baılanysty ekenin ańǵartady.
Qoǵam aldyndaǵy muǵalim mártebesi men olardyń áleýmettik-ekonomıkalyq ál-aýqaty qazirgi deńgeıden de jaqsara túsetin bolsa, adam kapıtalynyń sapasy da joǵary nátıjelerden kórinedi. Osy oraıda qoǵamymyzda ustazdarǵa artylatyn júk te, senim de salmaqty. Ustaz mártebesiniń joǵary bolýy – bilim sapasyn arttyrýdyń birden-bir kepili. Oǵan búkil qoǵam bolyp atsalysý kerek. Bul degenimiz, el mereıiniń bıikteýine, bolashaq urpaqtyń sanaly tárbıe alýyna, órenderdiń el patrıoty bolýyna tikeleı oń yqpalyn tıgizedi. Eldiń túrli salasyn joǵary deńgeıge kóterý úshin kez kelgen adam óziniń jumys ornynda, otbasynda oǵan atsalysýy kerek.
Maıra AMANTAEVA,
«Qazaqstandaǵy salalyq bilim jáne ǵylym qyzmetkerleri kásiptik odaǵy» QB tóraıymy, Qazaqstan Respýblıkasynyń eńbek sińirgen qyzmetkeri