Talap tabysqa bastaıdy

Árıne, bar ómirin bala tárbıesine, jas ur­paqqa bilim berý isine arna­ǵan alǵaýsyz jandar­dy mundaı tilektestik pen qam­qorshyldyq qanat­tandy­rady. Osy rette ózim eńbek etip júrgen Sarqan qalasyndaǵy N.Ostrovskıı atyndaǵy gýmanıtarlyq-ekonomıkalyq mektep-lıseıindegi oqý-tárbıe isin utymdy uıym­das­tyrýdyń arqasynda máýe­legen jemisterdi tilge tıek etkim keledi.

Bizdiń ujymda árbir  muǵa­limniń óz mamandyǵyna degen qushtarlyǵy, jumys­taǵy jaýapkershiligi, shy­ǵarmashylyq izdenisi birinshi orynǵa qoıylady. Bul arada basshy tarapynyń  talap­shyldyǵy da úlken ról at­qara­tynyn qaperde ustaǵan lázim. Al bizdiń bilim ordasynda osy talapshyldyq sońǵy birneshe jyl boıy joǵary deńgeıden kórinýde. Sóıtip, jalpy ujym bolyp qalyptasqan jańasha oılaý, jańasha jumys isteý óziniń oń nátıjelerin berip te jatyr.

Bul arada bos dabyra, qur uran­shyldyq qajet emes eke­nin eskergen jón.  Kún­de­likti qumyrsqa eńbek, oqý­shylardyń jan dúnıe­sine ene bilý, synnan ótken ozyq tájirıbege súıený, óz tájirıbeńdi qalyptastyrý shákirttiń de bilimge qush­tar­lyǵyn, ynta-zeıinin arttyrady. Osy baǵytty berik ustanǵan mektep-lıseıimiz sońǵy bes jyl ishinde kóptegen jaqsy kórsetkishterimen aldyńǵy qatarly bilim ordasy bolyp otyr. Ustazdardyń biliktilik daǵdylarynyń ósýine qaraı oqýshylardyń da bilim sapasy arta túsýde. Aıtalyq, budan bes jyl burynǵy oqýshylardyń sany – 424, bilimdik kórsetkishi –  53 paıyz bolsa, qazirgi tańda mekteptegi oqýshy sany 821-ge jetip, bilim sapasy 67,9 paıyzben aıshyqtalǵan.

Ynta men zeıin eki jaq­tan da birdeı bolmasa, eńbek esh ketpek. Mektebimizde bilim berýge, shákirt júregin jaý­laýǵa, oı-sanasyn bilim keńis­tigine talpyndyrý­ǵa mu­ǵa­limder barynsha kúsh sala­dy. Ustazdyq ulaǵatqa kir­shik túsirmeýge sát saıyn umtylady desek, artyq aıt­qan­dyq emes. Shákirtterdiń ár pán­di, sabaqty shat kóńilmen, qushtar peıilmen ıgerip oqýyn nazarda ustaıdy. Mektep ujymyndaǵy bir maqsatqa jumylǵan yntymaqshyldyq aýan, bilimge qushtar shyǵar­mashyl ortaq óris, taǵylymdy hám tartymdy orta osylaı qalyptasýda. Oqýshylardy bilimge yntalandyrý oraıynda oblystyq, respýblıkalyq jáne halyqaralyq  pán olım­pıadalarynyń múmkin­digi men tartymdylyǵy paıdalanylýda.

Ustazdarymyz ýaqyt kóshi­ne ilesýdi murat tut­qan. Alty áriptesimiz ob­lys­tyq pedagogıkalyq oqý­lar­ǵa qatysyp, júldeli marapat­tarǵa ıe boldy, alqaly synda joǵary biliktilikterin, taǵylym úlgilerin tanyt­ty. Osyndaı ozyq tájirı­be­leriniń arqasynda mektep-lıseı­diń jetistikteri «Qazaq­standaǵy zamanaýı bilim berý» jınaǵyna basylyp shyqty. Mektep tájirıbesi halyqaralyq «Bolshaıa mejdýnarodnaıa ensıklopedııa» kitabynda da jınaqtalyp, «Úzdik bilim mekemesi» belgi­simen marapattaldy.

Bilim ordamyzda «Mektep» murajaıy uıymdastyryl­dy. «Atameken» baǵdar­la­ma­sy aıasynda  «Ulttyq salt-dás­túrimiz», «Tarıhtyń kóleń­kede qalǵan betteri» degen taqyryptarda izde­nis jumystary júrgizil­di. Sóıtip, mektep oqýshylary­nyń týǵan jer tarıhyn bilip ósýine, týǵan eldi súıer otan­shyl­dyqqa baýlýǵa jaǵdaı jasaldy.

Elbasy aıtqan ıntellektýaldy ult qalyptastyrý, adamı kapıtal sapasyn jaqsartý isindegi muǵalimderdiń róli úlken ekendigin bilemiz. Olaı bolsa, bizdiń mekteptiń ustazdary da osynaý uly maqsattyń aldyńǵy shebinen tabylyp, bilimdi urpaq tár­bıeleý jolynda talmaı izdenip, talaptana bermek.

Merýert TEMIRBEKQYZY,

N.Ostrovskıı atyndaǵy mektep-lıseıiniń muǵalimi

Almaty oblysy,

Sarqan qalasy