Alqa otyrysyna Prezıdent Ákimshiliginiń, Premer-Mınıstr Keńsesiniń, Parlamenttiń ókilderi, basqa da memlekettik organdardyń jáne ulttyq kompanııalardyń basshylary qatysty. Jıynnyń basynda sóz alǵan Syrtqy ister mınıstri Qaırat Ábdirahmanov Elbasynyń bıylǵy Joldaýynda alǵa qoıylǵan mindetterdi jáne Bes ınstıtýttyq reformany júzege asyrýdyń mańyzy men ózektiligin atap ótti.
– Ekonomıkalyq dıplomatııany kúsheıtý – Syrtqy ister mınıstrliginiń jáne onyń shetelderdegi mekemeleriniń barlyq júıesiniń asa mańyzdy mindeti. Osyǵan qatysty Memleket basshysynyń tapsyrmasymen «Maqsatty elder, taýar aıqyndamasynyń tizimi, qazaqstandyq ónimderdi shetelderde usynýǵa baılanysty jumystar bekitilgen qazaqstandyq ónimder eksportyn ilgeriletý» jónindegi birlesken jobaǵa qol qoıyldy. Jaqyn arada ınvestısııa tartýǵa baılanysty taǵy bir mańyzdy qujatqa qol qoıylýǵa tıis. Qazir Syrtqy ister mınıstrligi men Aýyl sharýashylyǵy mınıstrligi arasynda Birlesken joba iske asyrylýda, – dep atap ótti ol.
Q.Ábdirahmanov ekonomıkalyq dıplomatııany odan ári damytý úshin mınıstrliktiń jumysyn qaıta qurý barysynda Elbasy tapsyrǵan mindetterdi jedel júzege asyrý qajettiligine nazar aýdardy. Maqsat – sheteldik ınvestısııalardy tartý, otandyq taýarlardy eksporttaý, kadr áleýetin nyǵaıtý, halyqaralyq arenada Qazaqstannyń múddesin qorǵaý boıynsha belsendi jumys júrgizý.
Alqa otyrysynda mınıstrliktiń ótken jyly ekonomıkalyq dıplomatııanyń basym baǵyttary boıynsha atqarǵan jumystary qorytyndylandy. Jalpy, ótken jyly Syrtqy ister mınıstrligi men onyń shetelderdegi mekemeleriniń tikeleı atsalysýymen saýda-ekonomıkalyq jáne ınvestısııalyq salada 300-den astam is-shara ótkizilipti. Qazaqstanǵa 600-ge tarta sheteldik delegasııanyń saparlary, qazaqstandyq delegasııanyń shetelderge saparlary uıymdastyrylǵan.
2016 jyldyń 9 aıynda tikeleı shetel ınvestısııasynyń jalpy kólemi 27,3%-ǵa ósip, 14,5 mlrd AQSh dollaryn qurady. Al 2005 jyldan bergi aralyqta elimizge 236 mlrd AQSh dollarynan astam tikeleı shetel ınvestısııasy tartylypty.
– Ekonomıkany ártaraptandyrý men ındýstrııalandyrý baǵdarlamasyn iske asyrý aıasynda Qazaqstan taýarlaryn eksporttaý geografııasyn keńeıtip, sheteldik ınvestısııalardyń turaqty túrde quıylýyn qamtamasyz etý kerek. Astanada ótetin EKSPO-2017 kórmesi oǵan zor múmkindikter beredi, – dedi Q.Ábdirahmanov.
Kásibı memlekettik apparat qurýǵa baǵyttalǵan 1-shi ınstıtýttyq reformany iske asyrý boıynsha alqa májilisinde kadr saıasatyn merıtokratııa qaǵıdaty negizinde jandandyrý, qyzmetkerlerdiń kásibı deńgeıin kóterý, tıisti zańnamalar men memlekettik qyzmetkerlerdiń Etıkalyq kodeksin múltiksiz saqtaý máselelerine basa nazar aýdaryldy. Mınıstrdiń aıtýynsha, Syrtqy ister mınıstrliginiń 400-ge jýyq qyzmetkeri sheteldik joǵary oqý oryndaryn bitirgen. 55 qyzmetker – «Bolashaq» baǵdarlamasynyń stıpendıaty bolyp tabylady.
Otyrys qorytyndysy boıynsha Syrtqy ister mınıstrligi alqasynyń qaýlysy qabyldandy.
Arnur ASQAR, «Egemen Qazaqstan»