– Kıiz adamdardyń turmysta qoldanýyna ekologııalyq eń taza materıal bolsa, óner adamdary úshin de óte qolaıly, qalaı ıseń solaı kele beretin materıal. Ony qazirgi jańa tehnologııalarmen árleı túskende qaıtalanbas sulýlyq beredi, – deıdi sýretshi, músinshi Baıan Batalova. Mamandar kıizdiń Qazaqstan brendiniń biri, elimizde jaqsy damyp kele jatqan etnotýrızmniń de mańyzdy bóligi ekenin aıtyp otyr. Kıizden jasalǵan buıymdar kórermenin tartpaı qoımaıdy. Sheberdiń aty – sheber, qostanaılyq ismer Natalıa Sharova kıizden monshaqqa deıin jasaıdy.
– Kıizden jasalǵan monshaqty Máskeý qalasyndaǵy bir kórmeden kórip, onyń ereksheligi, ádemiligi meni qatty qyzyqtyrdy. Ony ózim jasaı bastadym. Sońǵy jyldary kıiz basýmen, odan buıym jasaýmen aınalysyp kelemin. О́zime kıizden kóılek tigip aldym. Qazir 9 jasar qyzym ekeýmiz kıiz basýdyń qyr-syryn meńgerip alǵanbyz. Kıizden buıym jasap shyǵarý sonshalyqty ońaı jumys emes. Mysaly, kóılektiń sánin, jarasymyn oılap tabýǵa kóp ýaqyt ketýi múmkin. Al kıizden óziń oılaǵan kóılekti bir aptanyń ishinde bitirýge bolady, – deıdi Natalıa Sharova.
«Kıiz álemi» kórmesin uıymdastyrýǵa oblysqa belgili sýretshi Svetlana Shalýnova bastama kótergen edi.
– Men sońǵy kezde keskindeme janrynan sál burylyp, kıizge boı uryp júrmin. Negizi meni qazaq halqynyń ulttyq dástúri men turmys salty erekshe qyzyqtyrady. Kıiz qandaı ǵajap dúnıe deseńizshi! Kez kelgen sýretshi kıizben jumys istegen shyǵarmasy arqyly aıtar oıyn jetkize alady dep oılaımyn. Qazir Qostanaıda da kıizben jumys isteıtin sýretshiler, qolónershiler qatary ósip keledi. Men olardyń basyn qosýǵa shaqyrdym, – deıdi Svetlana Ivanovna.
Kórmege sýretshiler Svetlana Shalýnova, Svetlana Býrseva, qolónershiler Irına men Natalıa Ilchıbaevalar, Elena Korıakına, Arlan Ańqaýov jáne Dınara Qypshaqbaevanyń shyǵarmalary qoıyldy. Olardyń aıtýynsha, kıizden kilemnen bastap, kıimge, aıaq kıimge, qýyrshaq pen gúlge deıin jasaýǵa bolady.
Názıra JÁRIMBETOVA, «Egemen Qazaqstan»
QOSTANAI