Yntymaqtastyq komıtetiniń bul jolǵy otyrysy Eýropalyq odaq pen Qazaqstan arasyndaǵy yntymaqtastyq tóńiregindegi únqatysýdy keńeıtýge jáne buǵan deıingi qalyptasqan qarym-qatynasty nyǵaıtýǵa, onyń ishinde aımaqtyq turaqtylyq pen damý jolyndaǵy ózara múddelestikke negizdeldi.
Otyrysqa qatysýshylar 2015 jyldyń 21 jeltoqsanynda Astanada qol qoıylǵan Keńeıtilgen seriktestik jáne yntymaqtastyq týraly kelisim aıasynda ekijaqty saıası jáne ekonomıkalyq áriptestikti damytý tóńireginde sóz qozǵady. Dıplomattar bul tarıhı qujatty júzege asyrý yqpaldastyq kókjıegin barlyq sala boıynsha keńeıtýge múmkindik beretinine senim bildirdi.
Roman Vasılenko: «Eýropalyq odaq – Qazaqstannyń jetekshi saýda-ekonomıkalyq jáne ınvestısııalyq seriktesi. Onyń enshisine Qazaqstannyń syrtqy taýar aınalymynyń 50 paıyzy jáne elimiz ekonomıkasyna quıylǵan shetel ınvestısııasynyń jartysynan kóbi tıesili», – deı kele, ekijaqty taýar aınalymynyń ýaqyt ótken saıyn qarqyn ala túskenin jetkizdi. Máselen, 2016 jyly Qazaqstan – Eýropalyq odaq arasyndaǵy taýar aınalymy 24,1 mlrd AQSh dollaryn quraǵan. Onyń ishinde eksport – 18,4 mlrd eýro bolsa, ımport – 5,6 mlrd eýro.
«Jalpy, bul jıyn aýqymdy máselelerdi jan-jaqty qozǵaıdy. Olar saıası-ekonomıkalyq, saýda, óńir qaýipsizdigi, energetıka, kólik, tranzıt, bilim salalarymen tikeleı baılanysty. Qazaqstan men Eýropalyq odaq arasyndaǵy Keńeıtilgen seriktestik jáne yntymaqtastyq týraly kelisim 29 salany qamtıdy. Bizdi Eýropalyq odaqpen myqty dıplomatııalyq áriptestik tetigi baılanystyryp keledi. Keńeıtilgen seriktestik jáne yntymaqtastyq týraly kelisim – osynyń aıǵaǵy», dedi óziniń sózinde Syrtqy ister mınıstriniń orynbasary.
Lıýk Devın de Roman Vasılenkonyń sózin qýattady. «Eýropalyq odaq pen Qazaqstan yntymaqtastyǵy, shynymen de, jaqsy deńgeıde. Eýropalyq odaq – sizderdiń elderińizdiń iri saýda jáne ınvestısııalyq áriptesi. Búginde Qazaqstan álemdik jáne óńirlik turǵydan alǵanda, beıbitshilik jáne qaýipsizdikti qamtamasyz etý baǵytyn berik ustanǵan eń mańyzdy áriptesimizge aınalýda. Jaqyn kúnderi Qazaqstanda Eýropalyq odaq pen Ortalyq Azııadaǵy saıası jáne qaýipsizdik máselelerine arnalǵan joǵary deńgeıdegi taǵy bir shara ótedi», – dedi.
Jıynda, sondaı-aq, bilim berý, sý resýrstaryn basqarý, qorshaǵan ortany qorǵaý, quqyq ústemdigi, qaýipsizdik, terrorızm jáne esirtki bıznesimen kúres sekildi salalar boıynsha yntymaqtastyqtyń ózekti máseleleri, Eýropalyq odaq pen Qazaqstan azamattary úshin vızalyq rejimdi jeńildetý jaıy talqylandy.
Láıla EDILQYZY,
«Egemen Qazaqstan»