Ol búginde «Ońtústik» óńirlik áskerı qolbasshylyǵynyń 01731 áskerı bóliminde qyzmet etedi. Qyzmeti – qarý-jaraq jáne radıasııalyq hımııa-bıologııalyq qorǵaný quraldaryn jóndeý sheber-mamany. On jylǵa jýyq ýaqyttan beri osy salada qyzmet etip kele jatqan Ásel búginde qarý-jaraqtyń «tilin» bes saýsaǵyndaı biledi. Bul iske mashyqtanǵan ol qorǵaný quraldaryn da ózi jóndeı beredi. Shynynda da qarý-jaraqtyń qupııasyn bilý, ony meńgerý tabandylyqpen qatar talantty qajet etedi. Keıde mundaı azamattardyń qabileti tańdanysymyzdy týdyryp ta jatady. Degenmen, árkimniń qarym-qabileti de óziniń tańdaǵan mamandyǵyna qaraı kórinetin bolsa kerek. Bir qaraǵanda, áskerı sala ásirese, qyz balasyna qol emes bolyp kórinýi de múmkin. Biraq mamandyqqa degen qushtarlyqtyń bárin de jeńetinin Ásel Saýrannyń taǵdyrynan kórýge bolady.
– Áskerı bólimdegi mamandardyń kómegimen az ýaqytta qarý-jaraqtyń qupııasyn meńgerip shyqtym. Búginde bul sala men úshin asa qıyndyq týdyrmaıdy. Degenmen, áskerı salanyń tártibi ózgeshe. Bul meniń óz qalaýymmen tańdaǵan mamandyǵym. Sondyqtan da temirdeı tártipti tý etken áskerı ómirge kózqarasym ózgeshe, – degen keıipkerimiz mamandyǵymen maqtanatynyn da jetkizdi.
2001 jyly Talas aýdany, Maıtóbe aýylynan arman qýyp kelgen Ásel áýeli M.H.Dýlatı atyndaǵy Taraz Memlekettik ýnıversıtetiniń «Jaratylystaný» fakýltetine hımııa-bıologııa mamandyǵy boıynsha oqýǵa túsedi. Qyz balaǵa tán mamandyq alyp, bilim berý isimen aınalysýdy maqsat etedi. Alaıda oılamaǵan jerden onyń ómiri ózge arnaǵa burylyp sala beredi. Ýnıversıtettiń ekinshi kýrsyn támamdaǵan soń áskerı qyzmetker Marat Álimbekovke turmysqa shyǵady. Sóıtip, onyń da áskerı salaǵa degen qyzyǵýshylyǵy oıanyp, aqyry sonda aýysýǵa táýekel etedi. Áýeli kitaphanashy bolǵan Ásel Saýran keıin áskerı tártippen Ant qabyldaıdy. Jyldar óte áskerı bólimde mádenıet úıiniń basshysy laýazymyna deıin kóteriledi. Búginde joǵary nátıjeli jumysymen kózge túsip, elimizdiń Qorǵanys salasynda qaltqysyz qyzmet etip júrgen ol – qarý-jaraq jóndeý sheberi. Al jary Marat – sol 01731 áskerı bólimniń orkestrinde aǵa nusqaýshy.
Qarý-jaraq qupııasyn biletin qyz búginde ózi qyzmet etip júrgen áskerı bólimde abyroıǵa ıe maman. Endi tek qana eldiń tynyshtyǵyn kúzetýge eńbek etip, joǵary nátıjelerge qol jetkizýdi maqsat etip keledi. Erlermen birge el tynyshtyǵy úshin ter tógip júrgen zamandasymyzdyń áli de alar asýy alda.
Hamıt ESAMAN, «Egemen Qazaqstan» Jambyl oblysy