Qarabalyq aýdanynda «Qarabalyq volonterleri» jastar birlestigi úsh jyldan beri belsendi jumys istep keledi. Birlestikke aýdandaǵy qyryq shaqty ylǵı belsendi, talapty jas jınalǵan. Olar birlestik belsendisi Irına Tatıevanyń bastamasymen «Qaıyrymdy panda» atty oıyn oılap tapty. Bul ınternet jelileri arqyly jasóspirimderdi ózine qol jumsaýǵa ıtermeleıtin, búldirgi «Kók kıt» oıynyna qarsylyq kórsetý bolyp tabylady.
– «Kók kıt» oıyny jasóspirimderdi psıhologııalyq turǵydan orny tolmas ókinishterge aparatyny belgili. Al bizdiń qarabalyqtyq jastar oılap tapqan «Qaıyrymdy panda» oıyny balalardy, jastardy tek ǵana jaqsylyqqa jeteleıdi. Onda oıynshylarǵa 30 tapsyrma beriledi. Jastar áýelde osy tapsyrmalardyń barlyǵyn da aýdan kóleminde volonterlerdiń ózderiniń qatysýymen oryndap kórýdi oılastyrady. Al shyndyǵynda oıynǵa Astanadan, Reseıdiń Chelıabi oblysynan jastar qosyla bastady, – deıdi aýdandaǵy Jastar resýrsy ortalyǵynyń dırektory Irına Altynnıkova.
Oıyndy oılap tapqan volonterlerdiń aıtýynsha, tapsyrma qarapaıym turmystaǵy tirlikten aspaıdy. Mysaly, oıynǵa qatysatyn jas ózi tanymaıtyn bireýge hat jazady, odan zeınetkerge kómek berýin ótinedi nemese túngi uıqyǵa jatqanda kıip jatatyn kıimimen dúkenge baryp, tuz satyp alýdy tapsyrady.
– Mundaı tapsyrmalardyń da esh oǵashtyǵy joq, óıtkeni ol jastardy ózine senimdilikke tárbıeleıdi, – deıdi Irına Tatıeva. «Qarabalyq volonterleri» birlestiginiń músheleri áý basta oıyndy aıaǵyna deıin oınaǵan qarabalyqtyq jastarǵa syılyq daıyndaǵysy kelipti. Keıin ol oıynan qaıtypty.
– Jastar osy oıynǵa qyzyǵa qatysyp, balalar jaman qadamǵa barmasa, aman bolsa, sodan artyq qandaı syılyq bolýy kerek? Biz osylaı pátýalastyq, –deıdi Irına Altynnıkova. Qazir ınternet jelilerinde oıynǵa júzden asa oıynshy qatysyp úlgergen.
Názıra JÁRIMBETOVA, «Egemen Qazaqstan» Qostanaı oblysy, Qarabalyq aýdany