Bul aýqymdy is-sharaǵa túrli óńirlerdiń kásipkerleri de ázirlenip jatyr. Sheteldik qonaqtar men otandastarymyz Elorda tórinde tek ǵylymı jetistikterdi kórip qana qoımaı, qazaqstandyq óndirýshilerdiń azyq-túlik ónimderin de tutynady. Sol kompanııalardyń arasynda oblysymyzdaǵy balmuzdaq shyǵaratyn eki kásiporyn bar.
Oblystyq aýyl sharýashylyǵy basqarmasynyń málimetine súıensek, kórmege oraı Astanaǵa «Balmuzdaq» jáne «Azııa holod» jaýapkershiligi shekteýli seriktestikteri mamyr aıynda 5 tonnadan, jalpy, 10 tonnadaı balmuzdaq jiberedi. Suranysqa baılanysty jospar ózgerip, balmuzdaq kólemi artýy da, kemýi de múmkin. Taıaýda qos kompanııaǵa basqarmadan resmı hat joldanyp, jospar jasaldy. Eń bastysy, otandyq taýar óndirýshilerdiń «EKSPO–2017» kórmesine kóptep shaqyrylýy bizdiń kásipkerler úshin óte tıimdi.
Kórmeni uıymdastyrýshylardyń tańdaýy bul kompanııalarǵa beker túsip otyrǵan joq. Tólebı aýdanynda ornalasqan «Balmuzdaq» JShS-niń ónimderi sapasy men til úıirer dámi arqyly talaılardy tamsandyryp úlgergen. 1987 jyly ashylǵan «Balmuzdaq» JShS táýelsizdik alǵannan keıin qanatyn keńge jaıyp, ónim kólemi arta tústi. Elimizdiń birneshe oblysynyń naryǵyn jaýlaǵan tólebılikter kórshiles Qyrǵyzstanǵa da balmuzdaq jibergen. «Azııa holod» JShS de búginde óz ónimderimen jurtshylyqqa unap júr. Shymkenttiń balmuzdaǵyna suranys joǵary.