Qytaı Halyq Respýblıkasyndaǵy Nannın pedagogıkalyq ýnıversıtetinde L.N. Gýmılev atyndaǵy EUÝ-men birlesken «Eýrazııalyq ǵylym jáne tehnologııalar mektebi» ınstıtýty ashyldy, dep habarlaıdy Egemen.kz.
Instıtýt-fılıalda Qytaı azamattary hımııa jáne bıologııa baǵyttary boıynsha bilim alady. Oqý baǵdarlamasy tolyqtaı EUÝ standarttaryna negizdelgen. Jobanyń basty artyqshylyǵy – túlekterge eki joǵary oqý ornynyń dıplomy birdeı tabystalady. Instıtýt úshin Nannın pedagogıkalyq ýnıversıteti bazasynda oqý úderisin joǵary deńgeıde uıymdastyrýdy qamtamasyz etetin zamanaýı tehnıkalyq quraldarmen jabdyqtalǵan jeke ǵımarat bólingen.
Elordalyq oqýshy Garvard ýnıversıtetine oqýǵa tústi
Instıtýttyń ashylýy halyqaralyq akademııalyq yntymaqtastyqty damytýǵa, joǵary bilikti mamandar daıarlaýǵa, sondaı-aq Qazaqstan men Qytaı arasyndaǵy ǵylymı-bilim berý baılanystaryn keńeıtýge baǵyttalǵan.
Ashylý saltanatyna L.N. Gýmılev atyndaǵy EUÝ Basqarma tóraǵasy – rektory Erlan Sydyqov, Nannın pedagogıkalyq ýnıversıtetiniń prezıdenti Lýn Gýansın, atalǵan ýnıversıtettiń partııa komıtetiniń hatshysy Chjan Pen, sondaı-aq eki joǵary oqý ornynyń ókilderi qatysty.
«Qazaqstan Prezıdenti Qasym-Jomart Toqaev atap ótkendeı, Qytaı – Qazaqstannyń senimdi kórshisi, jaqyn dosy jáne máńgi strategııalyq áriptesi. Biz bul jobany tek akademııalyq baılanystardy keńeıtý quraly retinde ǵana emes, sonymen qatar ýnıversıtettiń básekege qabilettiligin arttyrýdyń jáne qazaqstandyq bilimdi halyqaralyq deńgeıde ilgeriletýdiń mańyzdy tetigi retinde qarastyramyz.
Jobanyń tarıhy 2022 jyldan bastalady. Júrgizilgen jumystardyń nátıjesinde 2023-2024 jyldary taraptar arasynda yntymaqtastyq týraly qujattarǵa qol qoıylyp, birlesken ınstıtýt qurý týraly kelisimge qol jetkizildi.Bul joba tek bizdiń ýnıversıtet úshin ǵana emes, jalpy Qazaqstan úshin de jańa qadam bolyp tabylady jáne ony eń perspektıvaly halyqaralyq jobalardyń biri dep ataýǵa bolady. Bul jańa kezeń Qazaqstan men Qytaı arasyndaǵy ǵylymı-bilim berý baılanystaryn nyǵaıtyp, mamandar daıarlaýǵa jańa múmkindikter ashady dep senemin», dedi EUÝ rektory Erlan Sydyqov.
EUÝ rektory aldaǵy ýaqytta bilim berý baǵdarlamalarynyń tizbesin keńeıtý jáne stýdentter sanyn arttyrý josparlanyp otyrǵanyn da atap ótti.
S. Seıfýllın atyndaǵy ýnıversıtet alǵash ret QS WUR by Subject 2026 reıtıngine endi
Nannın pedagogıkalyq ýnıversıtetiniń partııa komıtetiniń hatshysy Chjan Penniń aıtýynsha, Eýrazııalyq ǵylym jáne tehnologııalar mektebi – Qytaı Halyq Respýblıkasynyń Bilim mınıstrligi maquldaǵan Nannın pedagogıkalyq ýnıversıtetiniń alǵashqy birlesken bilim berý mekemesi jáne Qytaı men Qazaqstan arasyndaǵy alǵashqy birlesken oqý orny.
«Birlesken ınstıtýttyń ashylýy Nannın pedagogıkalyq ýnıversıtetiniń ınternasıonaldanýynyń jańa kezeńin bildiredi. Bul tek tájirıbelik qadam ǵana emes, sonymen qatar Qytaı men Qazaqstan arasyndaǵy bilim berý almasýlaryn tereńdetý, órkenıetterdiń ózara túsinistigin arttyrý jáne «Bir beldeý – bir jol» bastamasyn júzege asyrýǵa baǵyttalǵan naqty is-shara», dedi spıker.