«QazMunaıGaz» AQ-nyń basshylyǵy mınıstrge jobanyń birinshi kezeńi boıynsha atqarylǵan mehanıkalyq jumystardyń aıaqtalyp, ekinshi kezeń nysandarynda qurylys-montajdaý jumystaryn júrgizý kestesi týraly baıandady. Búginde «PetroQazaqstan» munaı óńdeý zaýytyndaǵy qurylys jumystaryna 4 myńǵa jýyq maman tartylǵan. Onyń bir myńdaıy qazaqstandyq mamandar.
Esterińizge sala keteıik, búginde elimizdegi úsh birdeı munaı óńdeý zaýytynda jańǵyrtý jumystary jalǵasyp jatyr. Aǵymdaǵy jyldyń ekinshi jartyjyldyǵynda Pavlodar munaı-hımııa jáne Atyraý munaı óńdeý zaýyttaryn jańǵyrtý jumystary aıaqtalady dep kútilýde. Al Shymkent munaı óńdeý zaýytyn jańǵyrtý jumystarynyń aıaqtalý merzimi 2018 jyldyń birinshi jartjyldyǵyna josparlanyp otyr.
«Árıne, úsh zaýytty jańǵyrtý jumystaryna qyrýar qarjy bólinip otyr. Iаǵnı, jańǵyrtý nesıe resýrstaryn tartý jáne atalǵan zaýyttardyń óz qarjysy esebinen júrgizilýde. Jalpy jańǵyrtý jumystary tolyǵymen aıaqtalsa, elimizdegi benzın sapasy jaqsaryp, dızel jáne kerosın ónimderiniń baǵasy turaqtanatyn bolady. Eń bastysy - 2019 jyly Qazaqstan Reseı benzınine táýeldilikten arylyp, eýrazııalyq odaqtyń talaptaryna saı ónim óndire bastaımyz», - dedi Energetıka mınıstri Qanat Bozymbaev.
Aıta keteıik, búginde Reseı Federasııasynan ishki naryqqa tasymaldyń 30 paıyzdyq táýeldiligi bar. Eger 70 paıyzdyq tutynýshylyq bizdiń úsh munaı óńdeý zaýyttarynyń esebinen qamtamsyz etilse, 30 paıyz otyn syrttan ákelinedi.
Mınıstrdiń qatysýmen ótken arnaıy jıynda Ońtústik Qazaqstan oblysynyń ákimi Janseıit Túımebaev kəsiporyn basshylyǵyndaǵy qytaılyq ınvestorlarǵa eń ózekti eki máselege nazar aýdarýdy eskertti.
«PetroQazaqstan» munaı óńdeý zaýyty oblysymyzdaǵy eń iri salyq tóleýshi kásiporynnyń birine aınalyp otyr. Atalǵan kásiporynda jergilikti jumysshylardyń úlesi kóbirek bolýy kerek. Iаǵnı jergilikti mamandardy jumyspen qamtý maqsatynda qajetti kásiptik-tehnıkalyq mamandardy daıarlaý máselesine kóńil bólýge keńes berer edim. Ol úshin oblys ortalyǵyndaǵy kásiptik tehnıkalyq mamandandyrylǵan kolledjdi óz qamqorlyqtaryńyzǵa alyp, jumys jasaǵandaryńyz durys. Sondaı-aq jergilikti jumysshylardy tájirıbe almasý maqsatynda shetelge jiberý isin jolǵa qoıǵan abzal», - dedi Janseıit Qanseıituly.
Bıyl ekinshi jartyjyldyqta Shymkent munaı óńdeý zaýytyn jańǵyrtýdyń birinshi kezeńi aıaqtalady. Sodan keıin elimizde Eýro-4, Eýro-5 standarttaryna saı janarmaı men dızel otyny shyǵaryla bastaıdy.
Munan soń Energetıka mınıstri Qanat Bozymbaev bastaǵan jumysshy top «Nurly jol» baǵdarlamasy aıasynda 2015 jyly paıdalanýǵa berilgen Shymkent qalasyndaǵy 160 gkal/saǵ. bolatyn qazandyqty aralap kórdi. Qazandyq búginde ákimshilik iskerlik ortalyǵyndaǵy 38 kópqabatty turǵyn úıdi jáne 6 ákimshilik ǵımaratty jylýmen qamtamasyz etip otyr. 2015 jyly paıdalanýǵa berilgen qazandyq gazben jylytylady. Nysannyń qurylysyna 3,4 mlrd teńge jumsalǵan.