Qazaqstanda halyqty panalaý oryndarymen qamtamasyz etý qaǵıdalary bekitildi. Saýda jáne ıntegrasııa mınıstrliginiń málimetinshe, jańa standart jertólelerdi, jerasty parkıngterin jáne basqa da jerasty keńistikterin qamtıdy, dep jazady Egemen.kz.
2026 jyldyń 1 qańtarynan bastap Qazaqstanda tótenshe jaǵdaılar kezinde paıdalanylatyn panalaý oryndaryna arnalǵan jańa standart kúshine endi. Atalǵan standartty Tótenshe jaǵdaılar mınıstrliginiń ótinimi negizinde «QazStandart» ázirlegen.
Saýda jáne ıntegrasııa mınıstrliginiń Tehnıkalyq retteý jáne metrologııa komıteti qujattyń tótenshe jaǵdaılarǵa daıyndyq deńgeıin arttyrýǵa jáne halyq qaýipsizdigin qamtamasyz etýge baǵyttalǵanyn atap ótti. Álemdik tájirıbede halyqty qorǵaý úshin jertóleler, sokoldik qabattar, jerasty ótkelderi men metropolıten sııaqty jerasty keńistikteri keńinen qoldanylady. Qazaqstanda da mundaı nysandar azamattyq qorǵanysqa arnalǵan qorǵanys qurylystary retinde beıimdelýi múmkin.
Jańa standart qoldanystaǵy normatıvtik olqylyqtardy joıyp, panalaý oryndaryna qoıylatyn biryńǵaı talaptardy engizedi. Qujat tabıǵı, tehnogendik jáne áskerı sıpattaǵy tótenshe jaǵdaılar kezinde halyqty qorǵaý maqsatynda ǵımarattardy tekserý jáne olardy beıimdeý tártibin aıqyndaıdy.
Azamattyq qorǵanysty jetildirýge baǵyttalǵan zań jobasy maquldandy
«Standartta úı-jaılardyń qurylymy men josparlanýyna, sondaı-aq tirshilikti qamtamasyz etý júıelerine qoıylatyn talaptar belgilengen. Olardyń qataryna jeldetý, sýmen jabdyqtaý, elektrmen qamtý, sanıtarııalyq jaǵdaılar jáne baılanys júıeleri kiredi. Sonymen qatar ǵımarattardyń tehnıkalyq jaı-kúıin baǵalaý tártibi, onyń ishinde kótergish konstrýksııalar men ınjenerlik júıelerdi tekserý talaptary qamtylǵan. Qajet bolǵan jaǵdaıda konstrýksııalardy kúsheıtý jáne úı-jaılardy qaıta beıimdeý sharalary kózdelgen. Standartta tıptik ınjenerlik sheshimderdiń úlgileri men panalaý oryndarynyń jaramdylyǵyn baǵalaý kestesi berilgen», delingen mınıstrlik habarlamasynda.
Joba Tótenshe jaǵdaılar mınıstrligi, Qorǵanys mınıstrligi, Ekologııa jáne tabıǵı resýrstar mınıstrligi, sondaı-aq basqa da múddeli memlekettik organdar jáne uıymdarmen kelisilgen.
Kelisý barysynda usynylǵan eskertýler tehnıkalyq sheshimderdi ázirleý kezinde geografııalyq, klımattyq jáne seısmıkalyq erekshelikterdi eskerý, ushqyshsyz ushý apparattarynan qorǵaný tetikterin engizý, qaıta beıimdeý syzbalarynyń úlgilerin qosý, panalaý oryndarynyń konstrýksııalaryn kúsheıtý jáne halyqtyń qoljetimdiligin qamtamasyz etetin avtomattandyrylǵan júıelerdi engizý máselelerin qamtydy. Barlyq usynystar eskerildi.
Atalǵan standartty qabyldaý jerasty keńistikterin tıimdi paıdalanýdyń biryńǵaı tásilin qalyptastyrýǵa jáne tótenshe jaǵdaılar kezinde halyqty qorǵaý deńgeıin arttyrýǵa múmkindik beredi.