Keshe Italııanyń Chıvıtavekıa qalasynyń sotynda aldyn ala tergeý sýdıasynyń, prokýror men advokat Ivana Mannıdiń qatysýymen ustalǵan qazaqstandyqtan alǵashqy jaýap alý úderisi bolyp ótti, dep habarlady QR SIM-iniń baspasóz qyzmeti.
Prokýror májiliste qazaqstandyqqa taǵylǵan úsh aıyptaý babyn habarlady. Olardyń ishindegi eń aýyry áýe kemesin basyp alýǵa árekettený bolyp tabylady. Bul bap uzaq ýaqyt túrmege qamaýdy qarastyrady.
Sýdıa aıyptaýmen kelisti. Atalǵan májiliste aıyptalýshynyń kepildeme arqyly nemese ketpeý týraly qolhat berý arqyly bostandyqqa shyǵý múmkindigi máselesin advokat kótergen joq. Sebebi, taǵylyp otyrǵan aıyp aýyr. Sonymen bir mezgilde, advokat ustalǵannyń densaýlyǵyn táýelsiz psıhoterapevtiń saraptamasynan ótkizý týraly suranys jasady. Bul suranysty sýdıa qoldady.
Sóıtip, aıyptalýshy qamaýǵa alyndy. Jaýap alýdyń kelesi ýaqytyn sýdıa keıin belgileıtin bolady.
Italııadaǵy Qazaqstan konsýlyna jergilikti bılikten ustalǵanǵa kún saıyn baryp turý quqyna qol jetkizý múmkin boldy. Sondaı-aq, keshe Qazaqstan Respýblıkasynyń Italııadaǵy elshiliginiń ókilderine V.G.Tolmachevpen kezdesý ótkizýge jaǵdaı týǵyzyldy.
Áńgime barysynda ustalǵannyń qamaýdaǵy jaǵdaıyna aryz-shaǵymy joq ekeni anyqtaldy. Ol bir adamdyq kamerada otyrsa, densaýlyǵyna baılanysty da alańdaıtyn eshteńe joq kórinedi. V.Tolmachevtiń ózi bolsa, kóńil-kúıi óte basyńqy jaǵdaıda eken. Onyń aıtýynsha, oqıǵa kezinde óziniń is-áreketin baqylaı almaı qalǵan; qylyǵyna qatty ókinedi jáne tergeýmen tolyq yntymaqtasýǵa daıyn.
V.Tolmachev ıtalıan tilin meńgergen, sondyqtan tárjimeshiniń qyzmetin qajetsinbeıdi.