– Memleket basshysy bıyl úsh birdeı jańa bastama kóterip, damý jolymyzdy jan-jaqty aıqyndap, baǵdarlap berdi. Birinshisi – elimizdi tehnologııalyq damýdyń jańa deńgeıine kóteretin aýqymdy jańǵyrý bolsa, ekinshisi – konstıtýsııalyq reforma arqyly saıası jańǵyrý. Elbasy endigi kezekte rýhanı jańǵyrýǵa jol ashý kerektigin kórsetip otyr, – degen óńir basshysy kópshiliktiń kóńilinen shyqqan maqala jaıynda jan-jaqty aıtyp ótti.
Elbasymyz «Bolashaqqa baǵdar: rýhanı jańǵyrý» atty maqalasynda osy jetistikterimizdi damytýdyń rýhanı baǵdarlamasyn usyndy. Bul baǵdarlama ultymyz úshin mańyzy tereń, aýqymy zor, ónegesi mol, halqymyzǵa rýhanı azyq bolatyn aıtýly dúnıe. Bul maqalada ótken tarıhı kezeńderge syndarly baǵa berilip, oı eleginen ótkizilip, elimizdiń rýhanı damý baǵyty aıqyndalǵan.
Budan soń baıandama jasaý úshin minberge oblys ákiminiń orynbasary Jaqsylyq omar kóterilip, maqalada kóterilgen máseleler boıynsha birinshi kezekte atqarylýy tıis jumystar jaıly jan-jaqty aıtyp ótti.
– Elbasy usynǵan jańǵyrtýlar qazaqstandyqtardy sanǵasyrlyq tarıh pen mádenıettegi, ulttyq sana-sezim men bilim salasyndaǵy rýhanı reformaǵa bastaıdy. О́zimizdegi eski qaǵıdattardan arylyp, búgingi kúnniń arnasymen alǵa qaraı umtylýymyz qajet. Osy oraıda, babalardan mıras bolyp qalǵan rýhanı qundylyqtardy kózdiń qarashyǵyndaı saqtaı júrip, ulttyq rýhty da jańǵyrtý kerektigi kúmán keltirmeıdi, – degen Jaqsylyq Muqashuly Elbasy maqalasynda aıtylǵan máselelerge toqtaldy.
Baıandamashynyń aıtýynsha, osy maqsat-mindetter mejesinde kóptegen ister men jumystar atqarý kerek. О́ıtkeni, qazirgideı jahandyq básekelestik bizden tynymsyz eńbekti, tabysty bastamalardy talap etedi. Bul jolda bilimniń tunyǵymen sýsyndap, sońǵy úlgidegi tehnologııalardyń tilin meńgergen jas urpaqty ulttyq salt-dástúr, ádet-ǵuryp boıynsha tárbıeleý qazaqstandyq brendti alǵa shyǵarady. Onyń ústine qınalǵanǵa qol ushyn sozǵan janashyrlyq, jetimniń mańdaıynan sıpaǵan meıirimdilik, ash adamǵa qolyndaǵysyn bólip bergen qaıyrymdylyq syndy qazaqy qasıetterdi óskeleń urpaqtyń boıyna sińirý beıbitshilikke, tynyshtyqqa qushtar ultymyzdyń bet-beınesiniń saqtalýyna septigin tıgizedi.
Álemge taralǵan qazaq halqynyń bir-birimen emin-erkin tildesýine, dúnıe júziniń ǵylymyna, bilimine eshbir kedergisiz jol ashylatynyn aıtqan Jaqsylyq Omar Elbasy maqalasynda «Jańa gýmanıtarlyq bilim. Qazaq tilindegi 100 jańa oqýlyq» jobasy men «Týǵan jer» baǵdarlamasyn engizý arqyly qazaqstandyq patrıotızmniń jarqyn úlgisin kórsetýdi mindettegenin jetkizdi. Sol arqyly Jetisý jerinen túlep ushqan árbir azamat oblystyń órkendeýine laıyqty úles qosýy kerek.
Budan soń kún tártibindegi taqyrypty talqylaý úshin Ilııas Jansúgirov atyndaǵy Jetisý memlekettik ýnıversıtetiniń «Máńgilik El» ǵylymı bilim berý ortalyǵynyń bas ǵylymı qyzmetkeri, fılosofııa ǵylymdarynyń doktory Amanjol Qasabek, «Almaty oblystyq slavıan qozǵalysy» qoǵamdyq birlestiginiń tóraǵasy Natalıa Belık, oblystyq «Jetisý» gazetiniń bas redaktory, Qazaqstan Respýblıkasynyń Mádenıet qaıratkeri, Qazaqstan Jazýshylar jáne Jýrnalıster odaǵynyń múshesi Ámire Árin, oblystyq «Ognı Alataý» gazetiniń bas redaktory, Qazaqstan Respýblıkasy Prezıdenti syılyǵynyń laýreaty Atsalım Idıgov, oblystyq óńirlik kommýnıkasııalar qyzmetiniń jýrnalıst-moderatory Galına Mıtkovskıh kezekpen minberge kóterilip, Elbasynyń «Bolashaqqa baǵdar: rýhanı jańǵyrý» atty maqalasynda kóterilgen máselelerdiń ózektiligi, mańyzdylyǵy jaıly jan-jaqty aıtyp ótti.
– Jetisý óńirinde birlik pen tatýlyqty, rýhanı kelisimdi, ekonomıkalyq damý úrdisterin saqtaý úshin naqty jumystar atqarylýy tıis. Oblystyq aqsaqaldar, ardager analar uıymy júrgizip otyrǵan jumystardy odan ári jalǵastyrý qajet. Jas urpaqqa tárbıe berý, olardyń boıyna ulttyq qundylyqtardy sińirý maqsatynda keshendi jumystar jospary jasalyp, iske asyrylýy kerek. «Janyńda júr jaqsy adam», «Qazaqstandaǵy 100 jańa esim» sııaqty jobalardy aýdan, qalalarda iske asyrýdy, óz jetistikterińizdi dáripteýdi tapsyramyn. Bul jóninde mamyr aıynyń 1-ine deıin naqty usynystar berilip, jumystar bastalýy tıis. Ár aýdan men qalada tarıhı, mádenı eskertkishterdiń tizimi jańartylyp, jastarǵa tárbıelik máni bar sharalar ótkizilýi tıisti, – degen oblys ákimi Amandyq Batalov aktıv jınalysyn qorytyndylady.
Mádı ALJANBAI