– Qazaqstan men Qytaı arasynda seriktestiktiń erekshe modeli qalyptasqan. Biz energetıkalyq jáne basqa da salalarda yntymaqtastyq ornatyp otyrmyz, – dedi Qazaqstan Prezıdenti.
Nursultan Nazarbaev QHR tóraǵasy Sı Szınpınniń «Bir beldeý – bir jol» atty halyqaralyq forýmǵa shaqyrǵanyna alǵys bildirip, bul is-sharaǵa qatysýǵa daıyn ekenin jetkizdi.
– Aldymyzda bizdi kóptegen birlesken jumys kútip tur. «Bir beldeý – bir jol» forýmyna qatysý úshin Beıjińge baratyn saparym barysynda biz «Nurly jol» jáne «Jibek joly ekonomıkalyq beldeýi» baǵdarlamalaryn ushtastyrý joldaryn jan-jaqty talqylaımyz, – dedi Memleket basshysy.
Chjan Gaolı QHR tóraǵasy Sı Szınpınniń Qazaqstan Prezıdentine joldaǵan sálemin jetkizip, Yntymaqtastyq jónindegi komıtet otyrysy aıasynda jańa ýaǵdalastyqtar jasalǵanyn atap ótti.
– Qytaı Halyq Respýblıkasynyń tóraǵasy bıylǵy maýsym aıynda «EKSPO-2017» halyqaralyq kórmesiniń ashylýyna jáne Shanhaı yntymaqtastyq uıymynyń sammıtine qatysý úshin Qazaqstanǵa kelýdi josparlap otyr. Sizdiń basshylyǵyńyzben Qazaqstanda ekonomıkanyń qarqyndy damýy jalǵasýda, áleýmettik turaqtylyq bar ekeni baıqalady, halyqtyń ál-aýqaty jaqsaryp keledi. Halyqaralyq arenada da Qazaqstannyń bedeli artyp otyr, – dedi Chjan Gaolı.
QHR vıse-premeri Qazaqstanda júzege asyrylyp jatqan reformalarǵa qoldaý bildirip, Nursultan Nazarbaevtyń rýhanı jańǵyrý jónindegi taıaýdaǵy bastamalarynyń mańyzdylyǵyna toqtalyp ótti.
Kezdesý sońynda Qazaqstan Prezıdenti elimizdegi ózgeristerdiń iske asyrylýyna qoldaý kórsetkeni úshin QHR basshylyǵyna alǵys bildirip, saýda jáne ekonomıka salasy boıynsha eki el arasyndaǵy baılanystar nyǵaıa túsedi dep úmittenetinin jetkizdi.