Parlamentshiler aımaqtaǵy orta bilim berýdiń jaǵdaıymen, ózekti máselelerimen jáne damý keleshegimen tanysyp, eńbek ujymdarymen, jalpy bilim berý, shaǵyn jabdyqtalǵan jáne arnaýly mektepter men lıseılerdiń ustazdarymen, ata-analar komıtetteriniń ókilderimen jáne oqýshylarymen kezdesti.
Qazaq tilinde jalpy bilim beretin №25 orta mektepte oblys ortalyǵynyń ustazdar qaýymymen kezdesý boldy. Sharada 12 jyldyq bilim berý baǵdarlamasyn engizý, balalardy úsh tilde oqytý, olardy sapaly oqýlyqtarmen qamtamasyz etý máselelerine erekshe nazar aýdaryldy. Júzdesýde elimizdegi jáne aımaqtaǵy bilim berý júıesiniń aldynda turǵan ózekti máseleler kóterildi. Jergilikti turǵyndar men ustazdar depýtattardan úsh aýysymda oqytý máselelerin sheshýge, alys eldi mekenderde turatyn balalardy mektepke tasyp ákelýdi qamtamasyz etýge yqpal etýdi surady. Shaǵyn jabdyqtalǵan mektepterdiń taǵdyry, ustazdardyń eńbekaqysy, «Bilim berý týraly» Zańdy iske asyrýǵa baılanysty alańdaýshylyqtaryn jetkizdi. Muǵalimderdiń saýaldaryna Bilim jáne ǵylym vıse-mınıstri Elmıra Sýhanberdıeva jaýap berdi.
Sapar barysynda depýtattar aýtıst balalar men aqyl-oı dertine shaldyqqan balalarǵa arnalǵan «Altyn bata» beıimdeý ortalyǵyna da bardy.
17 sáýirde senatorlar Pavlodar memlekettik pedagogıkalyq ınstıtýtynyń jumysymen tanysty. Meımandarǵa ǵylymı-tehnıkalyq jańalyqtar jáne olardyń óndiriske engizilgen nusqalary kórsetildi.
Professorlyq-oqytýshylar quramy aldynda sóılegen sózinde senator B.Áıtimova bilim berý men ǵylymdy úılestirgen joǵary oqý oryndary Prezıdent N.Nazarbaevtyń «Bolashaqqa baǵdar: rýhanı jańǵyrý» baǵdarlamalyq maqalasynda aıtylǵandaı, rýhanı jańǵyrýdyń aldyńǵy shebinde bolýy tıis ekenin atap ótti.
B.Áıtimova Memleket basshysy alǵa qoıǵan maqsattarǵa qol jetkizý týraly óz oılaryn ortaǵa saldy. Atap aıtqanda, ásirese jastarda ulttyq sana-sezimniń jańa negizderin qalyptastyrý, álemniń 100 oqýlyǵyn qazaq tiline aýdarý týraly áńgime qozǵaldy. Senator rýhanı jańǵyrýdaǵy básekege qabilettilik, pragmatızm, ulttyq biregeılikti saqtaý, bilimniń saltanat qurýy, damýdyń evolıýsııalyq joly, sana ashyqtyǵy sekildi maqsattarǵa qol jetkizýdiń mańyzyna nazar aýdardy. Sharaǵa qatysýshylar Memleket basshysy belgilegen mejeler barsha halyqtan, eń aldymen, bilim berý júıesinen zor kúsh-jigerdi talap etetini týraly ortaq pikirge keldi.
Saparǵa senatorlar Álı Bektaev, Jabal Erǵalıev, Nurlan Qylyshbaev, Tóleýbek Muqashev, Vladımır Redkokashın qatysýda. 18 sáýirde parlamentshiler Aqsý men Ekibastuz qalalarynda, Aqtoǵaı, Qashyr, Lebıaji, Pavlodar, Ýspen, Sharbaqty aýdandarynda ustazdar qaýymymen kezdesedi.
Oblysqa sapardyń qorytyndylary Senattyń Áleýmettik-mádenı damý jáne ǵylym komıtetiniń 19 sáýirde Pavlodarda ótetin kóshpeli otyrysynda qaralatyn boldy.