Kósh tizginin «Astana» aldy

Syrt alańda jaýapsyz úsh dop soǵyp, aıdarynan jel esken elordalyq klýbtyń erligin Almatyda «Qaırat» ta qaıtalady. Kahaber Shadadze shákirtteri aıaqdop alamany bastalǵaly top basyndaǵylardyń jýan ortasynda júrgen «Ordabasy» klýbyn 3:0 esebimen oısyrata utty. Sóıtip, almatylyq klýb úzdik úshtiktiń ishinen oıyp oryn aldy.

Bul týrǵa deıin top bastap kele jatqan «Ertis» óz alańynda «Qaısarmen» upaı bólisýge máj­búr boldy. Pavlodarlyqtar matchtyń 83-shi mınýtynda esep ashqanymen, oıynnyń sońyna deıin tabandylyq tanyta almady. Jeńistiń jalynan ustatpaǵany óz aldyna, kósh tizgini de ýystan sýsyp ketti. Al, birinshilikte birazǵa deıin top bastaǵan «Dala qasqyrlary» bolsa, syrǵyp-syrǵyp, týrnır kestesiniń belor­tasyna tústi...

Týrnır kestesindegi kórshiler «Taraz» ben «Aqjaıyq» bul joly bet jyrtyspaı, 0:0 esebimen teń tarqasty.

Kósh sońyndaǵy «Shahterdiń» shıraıtyn túri kórinbeıdi. Ken­shiler bul joly «Tobyldy» qabyldap, taǵy da teń tústi. Esep – 1:1. Qazir chempıonatta jeńiske jetpegen eki komanda bolsa, sonyń biri osy – «Shahter». Onyń ústine, qaraǵandylyqtar óz qaqpasyna goldy eń kóp jibergen kóńilshek klýb. Komanda ár oıynǵa shaqqanda ortasha eseppen eki doptan jiberip otyr.

Jetinshi týrda «Aqtóbe» men «Atyraý» arasyndaǵy oıyn ke­ıinge shegerildi. Sebep – Aqtó­bedegi stadıon men qosalqy alań oıyn ótkizýge ázirshe daıyn emes eken.

Jetinshi týrda oınalǵan match­tardyń nátıjesi mynadaı bolyp aıaqtaldy:

«Shahter» – «Tobyl» – 1:1 (0:1), Skoryh, 45+2 – óziniń qaq­pa­syna (0:1). Tájimbetov, 48 (1:1). «Oq­jet­pes» – «Astana» – 0:3 (0:0), Mý­jıkov, 61 (0:1). Gra­ho­vas, 64 – penaltıden (0:2). Murtazaev, 79 (0:3). «Qaı­sar» – «Ertis» – 1:1 (0:0), Rodrıgo, 83 (0:1). Ntı­bazonkıza, 86 (1:1). «Ta­raz» – «Aqjaıyq» – 0:0 (0:0). «Qaırat» – «Ordabasy» – 3:0 (2:0), Islamhan, 6 (1:0). Goý, 43 (2:0). Ilıchevıch, 70 (3:0). «Aktóbe» – «Atyraý», oıyn keıinge shegerildi.

Surmergender arasyndaǵy synda Jerar Goý («Qaırat») jeti golmen alda keledi. Ekinshi oryndaǵy Alekseı Shetkınniń («Tobyl») enshisinde tórt gol bar.

23 sáýir kúni ótetin 8-shi týrda komandalar bylaısha jup qurap, ózara kúsh synasady:

«Ordabasy» – «Tobyl», «Er­­tis» – «Qaırat», «Ak­ja­ıyq» – «Qaı­sar», «Asta­na» – «Taraz», «Aty­raý» – «Oqjetpes», «Aq­tó­be» – «Shah­­ter».

Qaırat ÁBILDINOV, «Egemen Qazaqstan»