Bul pavılonda TMD memleketteriniń óneriniń ozyq úlgilerin toptastyrǵan «Garage» atty búgingi zaman óneri ortalyǵynyń jáne «Grand Palais» atty Fransııa ulttyq mýzeıi birlestiginiń jetistikteri pash etilmek. Ol týraly EKSPO-nyń jańa medıa ortalyǵynda osy Art-ortalyqtyń ashylýyna arnalǵan tusaýkeserde «Astana EKSPO-2017» kompanııasynyń kontent jáne sharalar uıymdastyrý departamentiniń dırektory Marat Omarov baıandady.
EKSPO Art-ortalyǵy eki qabatty ǵımarattan turady. Munda sharalar negizinen – aǵartý jáne mádenıet baǵyty boıynsha júrgiziledi. Ortalyqtyń birinshi qabatynda kınozal, shyǵarmashylyq sheberhanalar, kórme qoıylymdary, Qazaqstannyń 12 jas sýretshisine arnalǵan «Jańa medıa» atty zerthana jumys isteıtin bolady. Ekinshi qabatta «Grand Palais» atty Fransııa ulttyq mýzeıi birlestigi sheberleriniń óner týyndylary ornalastyrylmaq.
«Art-ortalyqtyń ekinshi qabatynda 13 memleketten kelgen 17 sýretshi ózderiniń ónerpaz robottaryn kórsetedi. Bul robottar kórmege kelýshilerdiń kóz aldynda ártúrli aspaptar men neshe túrli óner týyndylaryn jasaıtyn bolady. Máselen, boıy 4 metrge jetetin Kýka atty robot tutas kesek tastardan kóz jaýyn alatyn neshe túrli músinderdi jasaıdy», dedi departament dırektory Marat Omarov óz sózinde.
Onyń aıtýy boıynsha, EKSPO-2017 qalashyǵyndaǵy Art –ortalyqtyń jumysyn bir saǵatta 400-ge jýyq adam tamashalaýǵa tıis. Sóıtip, Astanada kórme jalaýy jelbireıtin 93 kúnniń ishinde bul ortalyqqa 432 myń adam keledi dep kútilýde. Ortalyq 4 jastan asqan balalardan bastap eresekterge deıingi kórermenderdiń suranysyn tolyq qanaǵattandyrýdy josparlap otyr.
Álem jurtshylyǵy 2019 jyly ǵana tanysýǵa múmkindik alatyn robottar EKSPO-2017 kórmesiniń aıasynda osy Art-ortalyqqa kelýshilerge alǵash tanystyrylady.
Jylqybaı JAǴYPARULY, «Egemen Qazaqstan»