Adamnyń dosy sanalyp, halqymyz jeti qazynanyń birine balaǵan tórt aıaqty janýardyń adamǵa tıgizer paıdasy zor. Elimizdiń qaýipsizdik qurylymdary, naqtyraq aıtsaq shekaralyq keden qyzmeti, túrmedegi kúzet, aıdaýyldaý, qoǵamdyq oryndardaǵy tynyshtyqtyń saqtalýy taǵy da birqatar qyzmetterde qosymsha kúsh retinde arnaıy úıretilgen aqyldy ıtterdiń kómegine júginemiz. Kınologııalyq ortalyqtaǵy ıtter naqty sala boıynsha daıyndalady. Jarylǵysh zattardy anyqtaý, esirtki zattaryn áshkereleý, aqsha quralyn izdestirý, baǵaly ań múıizderin anyqtaý jumystary boıynsha kishkentaı kúshik kezinen bastap bilikti mamandar qolynda tárbıelenedi. Iаǵnı, joǵaryda aıtylǵan naqty quraldardyń ıisin sezýge mashyqtandyrylady. Tili joq janýardy tárbıelep olardyń babyn taýyp tabıǵı bolmysyn uǵyný kez-kelgenniń qolynan keler sharýa emes.
Osy rette Kınolog mamandardyń biliktiligin arttyrý mańyzdy. Kınologııalyq ortalyqta attestattaý komıssııasymen «B» korpýsynyń ákimshilik memlekettik qyzmetshileriniń attestattaýdyń úshinshi áńgimelesý kezeńi aıaqtaldy. Attestattaý komıssııasynyń quramyna múshe retinde qoǵamdyq uıymdardyń ókilderi «Generaldar keńesi» RQU mılısııa general maıory Osman-Rýstambek Bıjigitov, zań ǵylymdarynyń kandıdaty «Qazaq eńbek jáne áleýmettik qatynastar akademııasynyń» profesory Joldybaı Ospanov, Túrksib aýdandyq «NurOtan» partııasy fılıaly tóraǵasynyń birinshi orynbasary Nurlanbek Eskendiruly, sonymen qatar BAQ ókilderi qatysty.
«Ortalyǵymyzdaǵy ıtterdiń barlyǵy derlik asyl tuqymdy. Olardy erekshe kútimmen baptap, sheberlikke baýlyp, elimizdiń qaýipsizdik salasynyń barlyq qurylymdaryna jiberemiz. Ittermen jumys isteý asqan tózimdilik pen sheberlikti talap etedi. Sondyqtan, bizdiń mamandardyń ıyǵyna artylǵan júktiń salmaǵy aýyr. Kınologtardyń biliktiligin arttyrý, qaýipsizdiktiń kúshin qýattaý dep esepteımin», – deıdi aımaqtyq kınologııalyq ortalyqtyń basshysy, polkovnık Rysbek Smakov.
Áńgimelesýden ótken 12 qyzmetkerdiń arasynan attestattaýdyń qorytyndysy boıynsha 2 qyzmetker atqaratyn memlekettik laýazymyna saı dep tanylyp laýazymyn joǵarylatýǵa usynyldy, al 10 qyzmetker atqaratyn memlekettik laýazymyna saı keldi.
Arman OKTIаBR,
«Egemen Qazaqstan»