Qarashyǵanaq ken ornynda alǵashqy kezegi 1998 jyly ashylǵan «Kondensat» shaǵyn munaı óńdeý zaýyty ótken jyldyń jeltoqsan aıynda Eýro-5 ekologııalyq klasty avtomobıl otynynyń kommersııalyq óndirisin iske qosqan edi. Qazaqstan Respýblıkasynyń Prezıdenti Nursultan Nazarbaevtyń qatysýymen ashylǵan bul jeli jylyna 200 myń tonna joǵary sapaly janarmaı óndirip, elimizdiń batys óńiriniń suranysyn qamtamasyz etýge qabiletti.
«Bizdiń jańartý kezeńinen ótken zaýytymyzdyń múmkindigi aýyr munaı ónimderin tereń óńdep, aqshyl munaı ónimderin shyǵarýdy 90%-ǵa deıin arttyryp otyr. Búgin iske qosylyp otyrǵan vakýýmdyq aıyrý seksııasy jańa ónim – gazoıl men gýdron shyǵara bastaıdy. Bul – Qazaqstannyń ishki naryǵynda da, syrtqy rynokta da suranysy joǵary ónim», - deıdi «Kondensat» AQ bas dırektory Edýard Júnisov.
Aıta ketý kerek, munaı óńdeý zaýytyn jańǵyrtýǵa «Qazaqstan Damý Banki» (QDB) AQ kómektesken. Jobalyq quny 168,6 mln. AQSh dollary bolatyn jańǵyrtý jumystarynyń 70%-y QDB qarjysy eken.
- Munaı óńdeý salasyndaǵy jobalardy qarjylandyrý arqyly ekonomıkanyń basym salalaryn damytý – bizdiń banktiń mandatyna sáıkes keledi. Búgingi tańda bank elimizdegi úsh munaı óńdeý zaýytynyń ekeýin – Atyraý jáne Pavlodar zaýyttaryn jańǵyrtýdy qarjylandyryp otyr. Bul salaǵa qazir bank uzaq merzimdi jáne qymbat emes nesıe resýrstaryn usyna alady. «Kondensat» AQ-daǵy jańǵyrtý nátıjesinde zaýyt óńdeý qýatyn arttyryp, joǵary sapaly jańa munaı ónimderin alýǵa, sondaı-aq jańa jumys oryndaryn ashýǵa jáne kásiporyndy odan ári damytý kókjıegin keńeıtýge zor múmkindik týdy, - deıdi «Qazaqstan Damý banki» AQ-nyń aǵa bankıri Baqytjan Omarov.
«Kondensat» AQ bas dırektory Edýard Júnisovtiń aıtýynsha, zaýytty iske qosqaly, ıaǵnı 2016 jylydń jeltoqsanyna beri 20 myń tonnadan astam joǵary oktandy benzın óndirilgen. Sonyń 18,8 myń tonnasy Batys Qazaqstan oblysy naryǵynda satylǵan. Jospar boıynsha 2017 jyly kásiporyn 418 myń tonna munaı ónimin óńdep, 113 myń tonna AI-92, 14 myń tonna AI-95 markaly benzın, 23 tonna dızel otynyn, 16 myń tonna gýdron jáne 15 myń tonna qazandyq otyn óndirmek.
Kompanııada qazirgi tańda 475 adam jumys jasaıdy.
Qazbek Quttymuratuly,
«Egemen Qazaqstan»