Sharaǵa Qazaqstan men Reseıdiń oqý oryndarynan belgili bıolog ǵalymdar shaqyryldy. Bilim ordasynyń rektory Erkin Ábil konferensııa qonaqtary men oǵan qatysýshylardy osy mańyzdy sharanyń ótýimen quttyqtady jáne ekologııa, tabıǵat qorǵaý máselesin kóterip júrgen ǵalymdar jumysyna tabys tiledi.
Konferensııanyń plenarlyq májilisinde belgili bıolog ǵalym, Qazaqstandaǵy tabıǵı qoryqtar júıesiniń saqtalýyna kóp eńbek sińirip júrgen Tatıana Bragına, bıologııa ǵylymdarynyń doktory, L.Gýmılev atyndaǵy Eýrazııa ýnıversıtetiniń professory Murat Nuryshev, bıologııa ǵylymdarynyń doktory Evgenıı Bragın jáne taǵy basqalar tereń mazmundy baıandamalar jasady. Baıandamalarda Qazaqstandaǵy kıikter tobyryn saqtap qalýdyń problemalary men ony sheshý joldary, elimizdegi tabıǵat aýmaqtaryn qorǵaýdy damytýdyń zańnamalyq bazasy ózgerýiniń tarıhy, HH ǵasyrdyń jartysy men HHI ǵasyrdaǵy Qostanaı oblysy óńiri avıafaýnasynyń, sondaı-aq Soltústik Eýrazııa qustarynyń, ornıtofaýnasynyń ózgeristeri sekildi ózekti máseleler kóterildi.
Munan keıin konferensııaǵa qatysýshylar seksııalarǵa bólinip jumys istedi. Sonymen qatar, konferensııa sheńberinde ǵalymdar Naýyrzym qoryǵyna barady.
Názıra Járimbetova
«Egemen Qazaqstan»
QOSTANAI