Jyl saıyn baıqaýǵa belgili kompozıtor Keńes Dúısekeev, ózge de elderden kelgen belgili óner adamdary tórelik etedi. Qazylar alqasynyń qatysýshylarǵa talaby da joǵary. Olar ónerge talpynǵan balalardyń vokaldyq qabiletin, sahnada ózin ustaýyn, repertýar baılyǵyn – bárin-bárin súzgiden ótkizedi. Úsh kún boıy ánshilerdi tyńdaǵan qazylar alqasy jıyrmaǵa jýyq daryndy iriktedi.
«Osy baıqaýdyń Qazaqstannyń keleshegine jasap jatqan eńbegi óte zor dep bilemin. Biz talanttardy bala kezinde taýyp, onyń ónerdiń órine shyǵýyna sebepshi bolamyz», – dedi qazylar alqasynyń tóraǵasy Keńes Dúısekeev.
Bul joly baıqaýdyń bas júldesi Qostanaı oblysynyń ózinde qaldy. Qazylar alqasynyń qatań synynan ótken Bekbolat Jazyqbaev bas júldege laıyq dep tabyldy. Ol baıqaýǵa Áýlıekól aýdanynyń Qusuryn aýylyndaǵy mektepten kelip qatysty. Oblys ákimi Arhımed Muhambetov oǵan baıaýdyń Gran-Prı júldesi – 300 myń teńgeniń sertıfıkatyn tapsyrdy.
«Altyn mıkrofon» baıqaýy talanttardyń ustahanasy ispetti. Jas talanttardyń osy bedeldi baıqaýǵa qatysqanynyń ózi olar úshin boıdaǵy daryndy ushtaý degen sóz. Osy baıqaýdyń burynǵy júldegerleri arasynda qazir tanymal óner ıeleri az emes. Olardyń qatarynda qostanaılyq talanttar da bar ekenin maqtan tutamyz», – dedi aımaq basshysy.
Názıra Járimbetova
«Egemen Qazaqstan»
QOSTANAI