Májilistiń Ekologııa máseleleri jáne tabıǵat paıdalaný komıtetiniń tóraǵasy Erlan Nyǵmatýlın bul kúnderi Nıý-Iorkte ótip jatqan BUU Turaqty damý jónindegi komıssııasynyń 19-sessııasynyń jumysynda baıandama jasady.
Ol joǵary deńgeıdegi segmenttiń ashylýynda Qazaqstannyń 1992 jyly qabyldanǵan Iohannesbýrg josparynyń sheshimderin iske asyrý boıynsha qabyldaǵan sharalary týraly aıtty. Ol Qazaqstannyń N.Á.Nazarbaevtyń basshylyǵymen álemniń ıadrolyq qarýsyz damý prınsıpterin múltiksiz ustanatynyn, atap aıtqanda, Semeı polıgonynyń jabylýyn jáne turaqty damý prınsıpteri men bastamalarynyń birizdi júzege asyrylýyn atap ótti. Sonymen qatar, qatysýshylardy Qazaqstandaǵy turaqty damý, energııa jáne resýrs únemdeý salasyndaǵy baǵdarlamalyq qujattarmen, sondaı-aq elimizdiń eýropalyq jáne azııalyq yntymaqtastyq úderisterin jaqyndastyrý jónindegi sharalarymen jáne bastamalarymen tanystyrdy.
E.Z.Nyǵmatýlın sessııada kóterilgen máseleler boıynsha eki jaqty kezdesýler men ınteraktıvti jaryssózderge qatysty. Halyqaralyq qatysýshylar tarapynan Qazaqstannyń turaqty damý prınsıpteri men modelderin qoǵamdyq ómirdiń barlyq salalaryna engizý boıynsha qabyldaǵan sharalaryna oń baǵa berildi. Ásirese, 2010 jyly qabyldanǵan ekologııalyq taza, qaldyqsyz jáne resýrs únemdeıtin tehnologııalardy engizýge baǵyttalǵan Údemeli ındýstrııalyq-ınnovasııalyq damý jónindegi memlekettik baǵdarlama úlken qyzyǵýshylyq týǵyzdy.
Májilistiń Ekologııa máseleleri jáne tabıǵat paıdalaný komıteti tóraǵasynyń sessııa barysynda usynǵan aqparaty halyqaralyq qoǵamdastyqqa Qazaqstannyń ulttyq sharalardy júzege asyrýda, sondaı-aq turaqty damýdy qamtamasyz etýde halyqaralyq turaqty damý prınsıpterin ustanatynyn kórsetti.
Aıbatyr SEITAQ, jýrnalıst.