Saltanatty sharaǵa Batys Qazaqstan oblysynyń ákimi Altaı Kólginov, Qazaqstan Respýblıkasy Qorǵanys jáne aeroǵarysh mınıstri Beıbit Atamqulov, Qazaqstan Respýblıkasy Qorǵanys mınıstriniń orynbasary, general-maıor Talǵat Janjúmenov, Qazaqstan Respýblıkasy Qarýly Kúshteri Áskerı-teńiz qyzmetiniń bas qolbasshysy Jandarbek Januzaqov, «Qazaqstan ınjınırıng» Ulttyq kompanııasy» AQ-tyń basqarma tóraǵasy Erlan Ydyrysov, Qazaqstan Qarýly Kúshteriniń ardagerleri, «Zenıt» zaýytynyń ujymy, «Mańǵystaý» kemesi ekıpajynyń jeke quramy qatysty.
«Mańǵystaý» – «Zenıt» zaýytynyń konveıerinen shyqqan 26 keme. Ol Qazaqstan Respýblıkasy Qarýly Kúshteriniń Áskerı-teńiz qyzmeti úshin memlekettik tapsyrys boıynsha jasalynǵan. Budan burynǵy kemelerden ereksheligi – bul korabldiń qarý-jaraǵy jetildirilgen: sý astynan keletin qaýipti dıversııalyq áreketti, júzbeli qarsylasty anyqtaıtyn jáne qarsylyq kórsetetin qondyrǵy ornatylǵan, keme qurylysy kezinde buǵan deıin jasalǵan korablderde qyzmet etýshi áskerı teńizshilerdiń aqyl-keńesteri eskerilgen. Osylaısha, urys kemesiniń manevr múmkindikteri artyp, áskerı qýaty kúsheıip, ekıpaj úshin jaıly bola túsken.
– Búgin oraldyqtar ǵana emes, búkil Qazaqstan úshin erekshe kún. Qazaqstan Respýblıkasy keme jasaý salasynyń flagmany – «Zenıt» zaýyty el táýelsizdiginiń 25 jylynda 25 keme jasaǵan eken. Bul Prezıdentimizdiń modernızasııa, mashına jasaý ónerkásibin damytý degen tapsyrmasyna sáıkes jasalyp otyrǵan jumystar. Zaýytqa memlekettik tapsyrys berip, elimizdiń qorǵanys qabiletin únemi arttyryp, qorǵanysqa erekshe kóńil bólip otyrǵan Elbasymyzǵa alǵys aıtamyz, – dedi Altaı Kólginov.
Qorǵanys jáne aeroǵarysh mınıstri Beıbit Atamqulov óz sózinde «Zenıt» zaýytynyń múmkindigi búginde budan da úlken kemelerdi jasaýǵa jetetinin aıtty. «Táýelsizdiktiń alǵashqy jyldarynda zaýyt ujymyn saqtap, bilikti mamandardy ustap qalǵan basshylarǵa kóp rahmet! Biz búgin Qazaqstanda keme jasaý óndirisi qalyptasty dep nyq senimmen aıta alamyz. Árıne, Oral qalasynyń geografııalyq ornalasýy bizge biraz kedergi keltirýde. Sondyqtan Kaspıı teńiziniń jaǵasynan zaýyt fılıalyn ashý jospary qarastyrylýda» dedi mınıstr.
– «Zenıt» zaýytynan shyqqan kemeler bizdiń Kaspıı teńizindegi sý shekarasyn abyroımen qorǵap júr. Bizdiń áskerı teńiz kúshterimiz Kaspıı teńizi aımaǵyndaǵy memleketter arasynda ótetin áskerı-teńiz jattyǵýlary kezinde turaqty túrde aldyńǵy qatardan kórinedi. Bul – qazaqstandyq ónimniń álemdik standarttarǵa sáıkes, zamanaýı talaptarǵa laıyq mashına ekendigin dáleldeıdi, – dedi Qorǵanys mınıstriniń orynbasary, general-maıor Talǵat Janjúmenov óz sózinde.
Rasynda da, birlesken áskerı jattyǵýlar kezinde qazaqstandyqtar Reseı Federasııasynan keıin ekinshi oryn alady eken.
– Árıne, Reseı Federasııasy keme jasaý óndirisiniń 300 jyldyq tarıhy bar. Bizdiń otandyq óndiris 1993 jyldan bastalǵan. Sonyń ózinde mamandar qazaqstandyq kemelerdiń óte ıkemdi, urys talabyna saı ekendigin aıtyp júr. Búgingi urys kemesiniń ereksheligi – sý asty, sý ústi jáne teńiz nysandaryn joıýǵa arnalǵan qarý-jaraqpen jabdyqtalǵan. Biz óte qýanyshtymyz, keýdemizdi maqtanysh sezimi kernep tur, – dedi «Mańǵystaý» zymyrandy-artıllerııalyq kemesi kapıtanynyń kómekshisi, aǵa leıtenant Oljas Batyrbekov.
Aıta ketý kerek, Qazaqstan Respýblıkasynyń Kaspıı teńizindegi shekarasyn qorǵaý maqsatynda shyǵaryla bastaǵan zymyrandy-artıllerııalyq kemelerdiń alǵashqysy 2012 jyly 25 sáýirde sýǵa túsirilgen bolatyn. 0250 jobasymen bastalǵan bul korabl – «Qazaqstan» ataýyn ıemdendi. Odan keıin 2013-2014 jyldary zaýyt konveıerinen «Oral» jáne «Saryarqa» urys kemeleri teńiz qyzmetine attanǵan. Búginde olardyń bári de Kaspıı teńizinde Otanymyzdyń shekara qyzmetinde shepte tur.
Qazbek Quttymuratuly,
«Egemen Qazaqstan»
Oral