Abaı eskertkishi aldynda óleń oqylyp, án-jyr áýeledi

Mereke aıasynda elordadaǵy Abaı eskertkishi aldynda «Astana – Ota­nymyzdyń júregi, táýelsizdigimizdiń tiregi» atty kitap jáne poezııa merekesi bolyp ótti. Kúmbirlegen «Saryarqa» kúıiniń áýe­nimen ilese: «Armysyzdar, Astananyń sańlaqtary! Tolysqandaı elimniń jan-jaqtary, Toǵysqandaı osynda Alashymnyń, Has júırik baǵylany, ardaqtary» – dep bastalǵan jyr joldary oqylyp, sóz alýshylar tarapynan: «Bıyl elimiz úshin aıtýly jyl. Táýelsizdiktiń mereıli 20 jyldyǵy, Astanamyzǵa 13 jyl. Eńseli elor­da Alashtyń aıbynyn asyrdy. Adam­zatqa qazaqtyń aqpeıil, aq júregindeı aıqara qushaǵyn ashty. Aqmolanyń qudiretti rýhy uly dala muragerleriniń júregi men oı-qııalyn terbep, asqaqtata bermek. Hakim Abaı týraly Muhtar Áýezov: «Abaı – muhıt, muhıtty taýysýǵa bola ma?» degen eken. Sol muhıttaı Abaıdyń sońynda qalǵan murasynan halqymyz rýhanı baılyq alyp, asylǵa bergisiz árbir sózin jadynda ustaǵan. Halqyna óshpes mura qaldyryp, qazaq ádebıetin álemdik deńgeıde moıyn­datqan maıtalman klassıgimiz Abaıǵa taǵ­zym etý – biz úshin zor mártebe» delinip, arnaıy kitap jármeńkesimen kómkerilgen sahnanyń eki shetinen ulttyq kıimde ájeler kórermenderge shashý shashty. Memlekettik syılyqtyń laýreaty, aqyn Marfýǵa Aıtqojına men qalalyq tilderdi damytý basqarmasynyń bastyǵy Orazgúl Asanǵazy búgingi merekeniń mán-mańyzyn aıta kelip, búgingi bas qosýdyń basalqasy – «Táýelsizdik tańym atty araıly!» jyr músháırasy men «Muqa­ǵalı oqýlary» kórkemsóz oqý sheber­leriniń baıqaýy ekenin  atap ótti. Sóıtip, mereke barysynda aldyn ala irikteýden ótken 17 jas aqyn «Táýelsizdik tańym atty araıly!» jyr dodasynda baqtaryn synady. Bas júldeni – Qaraǵandydan kelgen Aqerke Asan jeńip alsa, «Ataýly dıplom» Qajybek Batylǵa buıyrdy. Al I-shi báıgeni – Saltanat Smaǵulova ıelense, II-shi jáne III-shi júldelerdi – Gúlsara Shalqar, Nazgúl Berdiqoja, Nurgúl Oqasheva, Saltanat Júsipova, Dınara Málik pen Móldir Aıtbaı qanjyǵalaryna baılady. Al «Muqaǵalı oqýlary» kórkemsóz oqý sheberleriniń baıqaý jeńimpazdaryn – Al­matydan arnaıy kelgen Juldyz Maqa­taev pen «Muqaǵalı Maqataev» atyn­daǵy qordyń tóraıymy Baqytkúl Aıdarova marapattap, arnaıy syılyqtaryn tabys etti. Berik SADYR.