Keńes dáýirindegi «Depýtat – halyq qyzmetshisi» degen sózge qulaǵymyz úırenip qalǵan, depýtat kórsek muń-muqtajymyzdy aıtqymyz kelip turady. Sol kezde depýtat bir okrýgpen saılanatyn da mezgili bitkenshe sol saılaýshylarynyń aldynda esep berip turatyn. Belgili bir tapsyrmalardy oryndaýǵa tyrysatyn. Qazir ondaıdy sırek baıqaımyn. Árıne, bárine kúıe jaǵýdan aýlaqpyn. Parlament depýtattarynyń belsendiligin buqaralyq aqparat quraldary arqyly bilemiz. Keıde soǵan qarap baǵa beremiz. Múmkin, ol da durys emes shyǵar.
Saılaý aldyndaǵy kezdesýlerde kópshiliginde jaqsylyqtardy úıip tógedi. Saılanyp alǵan soń at izin salmaıtyn depýtattar bar. О́z jaǵdaıyn kúıttep ketetinder qanshama. О́tkende bir depýtat teledıdardan: «Depýtat zeınetke shyqqan soń az zeınetaqyǵa qalaı ómir súredi», – deıdi. Men ol kisige suraq qoıar edim: «Biz qalaı ómir súrip jatyrmyz?» – dep.
Tamyz aıynda ótetin Senat saılaýyna daıyndyq bastalyp, depýtattyqqa kandıdattar usynylýda. Biz bilemiz, olardy máslıhat depýtattary saılaıdy. Al máslıhat depýtattaryn halyq saılady. Sondyqtan olar halyqtyń ókilderi. Sol saılaýǵa bararda máslıhat depýtattary óz saılaýshylarymen kezdesip, birneshe kandıdattyń ishinen sol orynǵa laıyǵyn tańdap, soǵan daýys bergeni durys bolar edi. Menińshe, ultyna, qyzmetine, partııalylyǵy men jasyna, t.b. jaqtaryna úlken mán bermeı, qolynan is keletin, bilimdi, halyqtyń qamyn shyn júregimen oılaıtyn, adal, azamattyǵy mol adamdy saılaýǵa umtylǵan jón bolar edi.
Depýtattyq korpýs myqty bolsa, jaqsy zańdar qabyldanyp, halyqqa qyzmet eteri sózsiz. Máslıhat depýtattary osy jaǵyna nazar aýdarsa eken deımin.
Erkin DÁÝEShULY, zeınetker.
Astana.