Kúlki – kóńil ajary

Respýblıkalyq kóńildiler men tapqyrlar klýbynyń fınaldyq oıyny Zaısan qalasynda máresine jetti Jaqynda elimizdiń shyǵysyndaǵy  Zaısan qa­la­synda el esinde qalatyndaı eleýli oqıǵa bolyp ótti. Bul dúbirli báseke el Táýelsizdiginiń 20 jyldyǵyna arnaldy. Kóńildiler men tapqyrlardyń oıynyn Zaısan qalasynda ótkizýdiń ózindik máni bar. Kórshi memleket Qytaımen shekaralas jatqan aýdan ekono­mıka­sy kúrt damyp keledi. Zaısan qalasynyń ortalyq kóshe­le­ri­niń biri Astana ataýymen atalmaq. Jaqynda Táýel­sizdik sımvoly – Báıterek monýmenti ortalyq alańda ornatyldy. Aýdan ákimi Serik Zaınýldınniń basta­masymen barlyq eldi mekenderde aǵash kó­shet­teri otyrǵyzylyp, aýlalar men kósheler tazartyldy. Aýdan turǵyndary 20 jyldyqqa arnap 20 myń aǵash kóshetin otyrǵyzdy. Hosh, sonymen gúldengen, nurlanǵan Zaısan qala­sy elimizdiń ár aımaǵynan kelgen ónerli jastardy ózi­ne jınady. Oblys ákiminiń kýbogy júldesine arnal­ǵan qazaqsha respýblıkalyq kóńildiler men tapqyr­lar klýby oıyndarynyń aqtyq máresi aýdandyq mádenıet úı­inde uıymdastyryldy. Oǵan jıyny segiz komanda qatysty. Olardyń qatarynda kórermen­de­rine úıdegi kógildir ekran arqyly jaqsy tanys Al­maty  qala­synan kelgen «Arman qala», Taraz qalasy­nan kelgen «Taraz-2000», qyzylordalyq «Qyzyq Orda», sony­men qatar, О́skemennen kelgen «Qoshemet», Semeı qa­lasynan kelgen «Semeı» jastar quramasy, semeılik taǵy bir komanda «Alıans», Kókpekti aýd­a­nynan kelgen «Tolaǵaı tentekteri» komandalary bol­dy. Al aý­dannyń namysyn byltyrǵy jyl boıynsha oblystyq oıyndardyń jeńimpazy, respýblıkada aı­shyqty oı­yndarymen, salıqaly ázilderimen tanylyp júrgen  «Nur Zaısan» komandasy qorǵady. Oıyndy bastan aıaq Qazaqstan «KVN» odaǵy qazaq lıgasynyń prezıdenti Esen Eleýken júrgizip otyrdy. Al Qazaq­stan­nyń ár aımaǵynan jınalǵan ónerli jastardyń res­pýb­lıkalyq «Zaısan-2011» festıvalin aýdan ákimi, jas­tardyń janashyry S.Zaınýldın quttyqtaý sózben ashty. – Qurmetti qonaqtar, elimizdiń ár qalasynan at arytyp kelgen jastar! Sizderge kıeli Zaısan jerine qosh keldińizder deımiz. Sizderdi oblys ákimi Berdibek Saparbaevtyń kýbogy júldesine arnalǵan, 140 jyldyq tarıhy bar Zaısan qalasynda ótip jatqan respýblıkalyq kóńildiler men tapqyrlar klýbynyń festıvaline qatysýlaryńyzben quttyqtaımyn. Barlyq komandalarǵa shynaıy básekelestik, sáttilik jáne jeńis tileımin, – dedi aýdan ákimi. Talantty jastardyń dýmandy básekesin osy do­daǵa qatyspasa da, ónerlerin kórsetip qaıtýdy maqsat etken Aıagóz aýdanynan kelgen jastar komandasy bastady. Osydan keıin-aq, zal toly jastardy tapqyr ázilderimen, kúlkili kórinisterimen, qyzyqty qımyl­darymen baýrap alǵan festıval jalǵasyp ketti. Eki saǵattan astam ýaqytqa sozylǵan kileń óner­paz jastardyń jarysynda qazylar alqasyna jeńim­pazdardy anyqtaý ońaıǵa túsken joq. Festıvaldiń qorytyndysynda quramynda aýdan ákiminiń orynba­sary Rýslan Qaıyrsynov, «Qazaqstan KVN odaǵy» jastar qoǵamdyq birlestiginiń atqarýshy dırektory Naǵı Baqytbekov, oblystyq ishki saıasat basqar­ma­sy­nyń jastar jáne úkimettik emes uıymdarmen jumys jónindegi bas mamany Erbolat Oshaqbaev, Tarbaǵataı aýdandyq «Tolaǵaı» jastar qoǵamdyq birlestiginiń jetekshisi Ermek Qurmanǵalıev, aýdandyq «Dostyq» gazetiniń dırektor-redaktory Dáýren Allabergenuly bar qazylar alqasy tómendegi úzdik óner kórsetken komandalardy jeńimpaz dep tapty. Kóńildi kórinisterimen, saýatty utqyr ázilderimen zal toly kórermenderdi baýrap alǵan «Taraz-2000» komandasy birinshi orynǵa, ádemi ázilderimen, kóz tartar kıimderimen kórermender esinde uzaq qalǵan zaısandyq «Nur Zaısan» jáne almatylyq «Arman qala» koman­dalary ekinshi orynǵa, Qyzylorda qala­synan kelgen «Qyzyq Orda» jáne semeılik «Alıans» komandalary úshinshi orynǵa ıe boldy. Júldeli oryn alǵan komandalar oblys ákiminiń júldelerimen mara­pattaldy. Budan basqa festıvalge qatysqan barlyq komandalarǵa ata­lymdar boıynsha marapattar men syılyqtar tapsy­ryldy. Festıval sońynda óńirge alǵash kelip turǵan Esen Eleýkendi sózge tartqan bolatynbyz. – Búgin Shyǵys Qazaqstan oblysynyń Zaısan qa­la­synda respýblıkalyq úlken KVN festıvali bolyp ótti. Aýdandyq deńgeıdegi shaǵyn qalada osyndaı úl­ken jıyn jaqsy uıymdastyrylǵan eken. Kóńilimiz toldy. Osynda jumys istep jatqan, oblystyq, aýdandyq ishki saıasat salasynyń mamandaryna atalmysh shara­nyń basy-qasynan tabylǵan jastarǵa rızamyz. Araılym Esimbekova jetekshilik etetin aýdandyq «Bastaý-Zaısan jastary» qoǵamdyq birlestiginiń jumysy óte jaqsy jolǵa qoıylǵan eken. Mundaı jıyndy ótkizýge qoldaý bildirip otyrǵan aýdan basshysy Serik Zaınýldınge ózimniń jáne jas­tar­dyń atynan úlken alǵysymdy aıtamyn. Zaısan qalasy kórkimen kóz tartady eken, dedi ol sózin túıindep. Ońdasyn Elýbaı, Dáýren Allabergenuly, jýrnalıst. Shyǵys Qazaqstan oblysy. Sýrette: aýdan ákimi Serik Zaınýldın men Esen Eleýken úzdikterdi marapattap tur.