Mamandyǵyna ǵashyq jan

Adamnyń jany aýyrǵan jerinde deıdi qazaq. Al tis aýyrǵanda she? Bebeýletip jiberetin aýrý janyńdy kózińe kórsetedi. Uıqy bermeı, mazań qashady. Al osy aýrýdan qutylyp, kóziń shyradaı janǵan kezde emdeýshi janǵa aıtar alǵysyńyz erekshe, árıne. Stomatologııa salasynda 22 jyl eńbek ótili bar Baqyt Bekentaıqyzy da tisi aýyrǵan talaı adamnyń alǵysyna bólengen jan. Kóptegen kisilerdiń rızashylyǵyn alyp, jıyrma jylǵa jýyq dáriger degen ataqty abyroımen arqalap keledi. Dárigerlik mamandyqqa bir emes, eki talpynystan soń túsken Baqytty ba­synda muǵalimderi pedagogıka salasyna barýǵa úgittepti. Bolashaqta kim bolaryn bilmeı, bulyńǵyr kúı keship júrgen qurbylastaryna qaraǵanda, maq­satyn naqty bilip, soǵan umtylǵan qyz sol joly oqýǵa túse almaıdy. Matematıka páninen bergen synyp jetekshim Baqyt jaqsy ustaz bolady dep kútken edi, dep jyly jymııady Baqyt Be­kentaıqyzy. Osy maqsatta Qostanaı pedınstıtýtyna daıyndalǵan bolatyn. «Maǵan joldama ákelip bergen kúni túnimen kóz ilmedim. Tań atqan soń joldamany qaıtaryp berdim de, dáriger bolamyn degen armanymdy aıttym. Olar joldamanyń barlyǵy taratyldy, qaıda barmaqsyń degen edi. Men aıtqanymnan qaıtpadym. Bul 1978 jyl bolatyn. Qostanaıǵa joldamamen barmaı, Qaraǵandy medınstıtýtyna tar­typ kettim. Oqýǵa túse almaǵan soń jumys isteı júrip, jyl boıy oqýǵa daıyndaldym. Kelesi jyly qaıta qujat tapsyryp, qalaǵan mamandy­ǵyma, stomatologııa fakýltetine tús­tim. Bul jyly da maǵan oqýǵa jazbaǵan eken. Dárigerlik tekserýden ótý bary­synda búıregimniń aýyratyndyǵy belgili bolyp, akademııalyq demalys aldym. Sóıtip, tek úshinshi jyly oqı bastadym. Oqýdy 1985 jyly bitirdim. 1984 jyly turmysqa shyqtym. Ju­baıym Áýezhanmen aýylda birge oqy­dyq. Dıplom alǵannan keıin eki jetiden soń tuńǵyshymdy bosandym. Meni joldamamen Qostanaıdyń Rýdnyı qala­syna jiberdi. 1987 jyly qyz balam ómirge keldi. Dárigerler búıregim aýyr­ǵan soń, tezirek ana bolýdy durys dep sheshti. 1989 jyly Qosta­naıdyń Naýyrzym aýdanyna kettim. Aýdandyq aýrýhanada úsh aı jumys istedim. Osy ýaqytta ob­lystyń bas stomatology Ernst Kre­mer tis protezine barýǵa, ortoped bolýǵa usynys berdi», deıdi ol. Ernst Ivanovıch jumysyn aıaqqa endi tura bastaǵan jas ma­manǵa senip, ortopedııa salasyna barýǵa usynys bildirýi úlken senim desek, artyq aıtpaǵan bolar­myz. Ári aýdan ortalyǵynda istep júrgen mamanǵa oblysta bilim alyp, mamandyǵyn jetildirý úshin bar kúshin salyp, eki aı maman­danýǵa Baqyttyń jubaıyna ózi telefon soǵady. Eki aı boıy aýdan men oblys ortalyǵy ara­syndaǵy joldy talaı tozdyrǵan Baqyt Bekentaıqyzy osylaısha stomatologııadaǵy jańa maman­dyq­ty ıgeredi. «Men Ernst Kremerge óte yrzamyn. Ol kisiniń ózi ortoped. Meni tańdaǵanyna áli kúnge deıin tańǵalamyn. Shynynda da ol meniń qabiletimnen osy maman­dyqty kór­gen bolar», – deıdi Baqyt. 1987 jyly aýdandaǵy aýrýhananyń tis protezi, orto­pedııanyń meńgerýshi­ligine ta­ǵaıyn­dalady. Osylaısha, onyń stomatologııadaǵy joly jal­ǵasady. «Men bir jyl boıy tis julýda hırýrg, eki jyl emdeýde boldym. Úsh aı balalar stomato­logııa­synda jumys jasadym. О́zim­niń qaı salada júırik ekendigimdi, qaı sala maǵan sonshalyqty jaqyn ekendigin bilgim keldi. Ári stomatolog bolǵan soń barlyǵynan habardar bolýyń kerek. Sońynda ortopedııaǵa keldim. Bul – naǵyz meniń maman­dyǵym. Kelgenime esh ókinbeımin. Dárigerlik salada júrgenime múmkin áýletimizdegi dáriger aǵa-apalarym­nyń da áseri bolar. Men áýel bastan-aq dárigerlikti janyma jaqyn qabyldadym. Qolyma kelip turǵan tegin joldamany al­maǵanym da so­nyń sebebi bolar. Jubaıym jumys babymen Astanaǵa shaqyrylǵan soń, osynda kóship keldik. Mine, endi elordada da qal-qaderimshe qyzmet etip jatyrmyn», deıdi ol. Baqyt Bekentaıqyzy 1998 jyly Astanaǵa kóship kelgennen soń Qara­ǵandyǵa baryp taǵy da mamandanady. Mine, ortostomatologtaǵy qyzmet ótili 12 jylǵa, jalpy stomato­logııadaǵy atqarǵan eńbek ótili 22 jylǵa qarap barady. Bilikti maman­dy shaqyrǵan jerler kóp bolǵany­men, bir kórgennen-aq dıagnoz qoıa biletin, emdeýdi júıeli júzege asy­ratyn, jumysyn tııanaqty atqa­ratyn dárigerdi ortostomatolog jibermeıdi. «Jumysymdy qatty jaqsy kóremin. Tipti jubaıym da ázili-shyny aralas jumysyńa qatty berilip ketkensiń deıdi. Shynynda da solaı, demalysqa shyqsam jumysymdy saǵynamyn. Neshe túrli tispen keledi, sony túzegenshe, emdegen adamnyń rıza bolyp jymıǵanda jumysyń­nyń nátıjesine masattanyp, sodan lázzat alamyn. Keıde tis salyp bergen adamdardy úıde ýaıymdap júretinim bar», – deıdi Baqyt Bekentaıqyzy. Bul – óz isin jaqsy biletin, eńbegine adal jannyń sózi. Myqty mamannyń otbasynyń ýyqtary da myqty. Otaǵasy Áýezhan ekeýi ulyn uıaǵa, qyzyn qııaǵa qondyryp, ata-ana paryzyn oryn­dap, aınalasyna úlgi bolyp otyr. Venera TÚGELBAI.