Oral qalasynda Abaı, Raıymbek batyr, Syrym, Mahambet, Isataı, Qurmanǵazy, Dına syndy ultymyzdyń uly tulǵalarynyń kelbeti beınelengen dápterler shyǵaryla bastady.
El táýelsizdiginiń 20 jyldyǵyna oraı «Nur Otan» HDP BQOF-tyń «Jaıyq press» JShS-daǵy bastaýysh uıymynyń muryndyq bolýymen atalmysh seriktestiktiń baspahanasynda basylǵan bul dápterlerdiń árqaısysy ázirge 500 danamen shyǵyp, kópshilikke jol tartty. 36 bettik dápterdiń baǵasy – 65 teńge. «Qazir oqýshylar negizinen sheteldik estrada, sport juldyzdarynyń sýretteri beınelengen dápterlerdi alatyny ras. Ol bolashaq urpaǵymyzdyń tárbıesine de áser etedi, –dedi osynaý otandyq ónimniń tusaýkeser sharasynda «Jaıyq press» JShS bas dırektory Jantas Safýllın. – Biz ózimiz oǵan balama retinde eshnárse usynbaı otyryp, bul jaıtqa renjı almaımyz. Mine, osy olqylyqtyń ornyn toltyrý baǵytynda jańa isti qolǵa alyp otyrmyz».
Tusaýkeserge qatysqan Oral qalalyq bilim berý bóliminiń bastyǵy Jansulý Tóremuratova oqýshynyń negizgi quralynda babalar beınesiniń salynýy otansúıgishtik sezimdi qalyptastyrýǵa oń yqpal etetinin tilge tıek etti. Al dápter muqabasyndaǵy Abaı men Mahambet sekildi ulylarymyzdyń bir aýyz óleńiniń ózi jastarǵa oı salyp, tulǵalardyń ómirderegi jaıly aqparattar da balalardyń jadynda tez jattalatyndyǵyna mán berdi.
Oral medısınalyq kolledjiniń dırektory, qalalyq máslıhattyń depýtaty Maqsot Bergen sabaq kezinde oqýshylardyń aldynda turatyn dápteriniń alǵashqy betinde dańqty ata-ájesiniń keskin-kelbeti beınelenýi, olardyń ónegeli ómirinen syr shertilýi jas urpaqtyń boıyna ulttyq rýhty darytýǵa sebepshi bolatynyn aıtty.
Otandyq taýardyń tanystyrylymyna «Nur Otan» HDP BQOF, oblystyq tilderi damytý basqarmasynyń ókilderi, bilim júıesiniń qyzmetkerleri, ata-analar men jýrnalıster qatysty.
Temir QUSAIYN,
Batys Qazaqstan oblysy.