«Barlyq paıdalanylǵan materıaldar – amerıkalyq ónimder. Bul – jaı ǵana qaǵaz emes, 40 tonna salmaqty kóteretin óte myqty materıal. Sonymen qatar, jylýdy da ustap turýǵa qaýqarly. Biz onyń beriktigin dáleldeı alamyz. Jalpy, túsinispeýshilik oryn alǵany úshin keshirim suraımyz. Qurylysqa qum, topyraq nemese osy tektes basqa da qarapaıym qospalardan jasalǵan dúnıelerdi paıdalanǵan emespiz. Birneshe kún buryn atalǵan aýmaqqa tıisti testileý sharalaryn júrgizdik. Synaq nátıjesi boıynsha materıal tózimdi boldy», dedi «Sembol» kompanııasynyń menedjeri Ahmet Qarahan. Júrgizýshi bolyp isteıtin beınerolık avtory Vıacheslav Pavlıýkov qoǵamda shý týdyrǵan jarııalanymy úshin keshirim surady. «Sońǵy eki kúnde beınerolıkke baılanysty jurt dúrligip ketkendikten, EKSPO qalashyǵyna kompanııa basshylyǵynan keshirim suraýǵa keldim. Maǵan jobalaýshy ınjenerler ol jerde parkıng bolatynyn túsindirdi. Júkti túsirgen kezde nysannyń aýmaǵynda materıaldy paıdalaný maqsaty jaıynda tolyq bilmeıtin edim. Degenmen, beınejazbany júktedim. Atap aıtqanda, beınerolıkti úsh apta buryn eki dosyma jibergenmin. Al osyǵan qatysty kesheden beri kópshilik shýlap ketti», dedi ol. 35 jastaǵy V.Pavlıýkov Astanada turady eken. Aıtýynsha, ázirge jumystan qýylmaǵan. «Derekkózge nazar aýdarsaq, materıaldy alyp kelgen adamnyń zamanaýı qurylys tehnologııalary jaıynda aıtyp jatqanyn ańǵaramyz. Ol bilimdi, oqyǵan jan shyǵar. Biraq onyń sózderin rastaıtyn eshqandaı málimet aıtylmady», dedi óz kezeginde «Astana EKSPO-2017» AQ Qoǵammen baılanys departamentiniń dırektory Sergeı Kýıanov.
Ashat RAIQUL, «Egemen Qazaqstan»