Oqytý eńbek naryǵyna shyǵa otyryp, jumysshy biliktilikten orta býyn mamany deńgeıine deıin eki deńgeıli oqý modeli boıynsha modýldik baǵdarlamalary arqyly kózdelgen. Sonyń biri - dýaldi negizde 1-den 6 aıǵa deıin qysqa merzimdi kásiptik oqytýǵa arnalady. Osy joba boıynsha jumyspen qamtý ortalyqtary tikeleı áleýetti qatysýshylardyń quramyn qalyptastyrady jáne tizimderdi aýdandyq (qalalyq) komıssııalarǵa jiberedi. Bul týraly búgin Ortalyq kommýnıkasııalar qyzmetinde ótken baspasóz konferensııasynda belgili boldy.
Oqytý kolledjderde, oqý ortalyqtarynda, áskerı-tehnıkalyq mektepterde ótedi. Azamattar memlekettik qoldaýmen shákirtaqy tóleýmen qamtamasyz etiletin bolady jáne syrttan kelgen tulǵalarǵa jol júrýge jáne turýǵa qosymsha tólem qarastyrylǵan.
Shalǵaı eldi mekenderde turatyn azamattar da mobıldi oqytý ortalyqtarynda bilim alý arqyly tegin mamandyqty meńgere alady. Iske asyrý serpindi rejimde Aqmola, Aqtóbe, Shyǵys Qazaqstan, Mańǵystaý, Qostanaı oblystarynda júrgiziletin bolady.
Brıfıngte «Atameken» ulttyq kásipkerler palatasy bıznes-kommýnıkasııalardy memlekettik tilde damytý departamentiniń dırektory Baýrjan Orazǵalıev jappaı kásipkerlik baǵdarlamanyń ekinshi baǵyty aıasynda «Bıznes bastaý» jobasy boıynsha kásipkerliktiń negizderi oqytylatynyn aıtty. Kásipkerlikke oqytylǵan azamattardyń óz jumysyn ashýǵa múmkindigi bolady. Olar óz isin bastaý úshin mıkronesıe de ala alady.
Baǵdarlamany iske asyrǵan jaǵdaıda jumyssyzdyqtyń deńgeıi 4,8 paıyzǵa jáne biliktiliksiz jumys kúshiniń úlesi 20 paıyzǵa tómendeıdi. Sonymen qatar, kompıýterlik saýattylyq deńgeıi jáne aǵylshyn tili, kásipkerlik negizderi daǵdylary boıynsha joǵarylaıdy.
Dastan KENJALIN, «Egemen Qazaqstan».