Roza Baǵlanova atyndaǵy «Qazaqkonsert» memlekettik akademııalyq konserttik uıymy sahnasynda «Operamen úndes mahabbat» atty áserli mýzykalyq kesh ótti. О́ner ordasy sol kúni klassıkalyq áýenge shóldegen kórermenge aıryqsha rýhanı tartý jasady.
Kesh shymyldyǵy álemdik opera jaýharlarymen túrildi. Djýzeppe Verdı, Antonın Dvorjak, Petr Chaıkovskıı, Sydyq Muhamedjanov operalarynan oryndalǵan arııalar men dýetter zal ishin tamasha kóńil kúıge bólep, tyńdarmanyn birde tolqytsa, birde tebirentti. Mahabbat taqyrybyn arqaý etken shyǵarmalar keshtiń mazmundyq ózegine aınalyp, árbir áýen júrek qylyn shertti.
Batyseýropalyq, qazaq, orys vokaldyq klassıkasynan shyrqalǵan romanstar men mınıatıýralar keshtiń boıaýyn qanyqtyra tústi. Ár týyndy sahnada shaǵyn dramalyq kóriniske aınalyp, kórermendi opera áleminiń tylsym keńistigine jeteledi.
Keshke Qazaqstannyń eńbek sińirgen qaıratkerleri – pıanıst Dolores Ýmbetalıeva men tenor Medet Shotabaev qatysty. Sondaı-aq «Daryn» memlekettik jastar syılyǵynyń laýreaty, barıton Rasýl Jarmaǵambetov pen respýblıkalyq, halyqaralyq baıqaýlardyń laýreaty Ulpan Áýbákirova óz ónerlerin ortaǵa saldy. Oryndaýshylardyń sahnadaǵy shynaıy emosııasy men vokaldyq sheberligi keshtiń kórkemdik deńgeıin aıryqsha bıikke kóterdi.
Konserttiń basty ereksheligi – sahna men zal arasyndaǵy úılesim boldy. Kórermender sahna tórinen oryn alyp, oryndaýshylarmen bir keńistikte tynystady. Mundaı format árbir dybys pen demdi jaqynnan sezinýge múmkindik berip, óner men kórermen arasyndaǵy baılanysty burynǵydan da bekemdeı tústi.
«Operamen úndes mahabbat» keshi tyńdarmanyn sulýlyq pen sezimniń álemine jetelep, klassıkalyq mýzykanyń máńgilik qudiretin taǵy bir márte dáleldedi. Bul keshte sahnada áýen ǵana emes, adam janynyń eń názik ıirimderi sóılegendeı áser qaldyrdy.