Raıymbek aýdanynyń qurylǵanyna bıyl 90 jyl tolyp otyr. Osyǵan oraı Saryjaz aýylynda «Sport – ult saýlyǵynyń kepili» atty densaýlyq festıvali uıymdastyryldy.
Qys qyzyǵyna keneltken is-sharaǵa aýdannyń 11 aýyldyq okrýginiń turǵyndary laıyqty daıyndyqpen kelip, oıyndardyń joǵary deńgeıde ótýine belsene atsalysty. Dástúrli densaýlyq festıvaliniń ashylý saltanatynda Raıymbek aýdanynyń ákimi Dastan Qudabaev jurtshylyqty aıtýly merekemen quttyqtap, aq qarda aıshyqty iz qaldyratyn tartysty jarystarda jeńimpaz bolýǵa tilektestigin bildirdi.
«Salamatty ómir saltyn qalyptastyryp, sportpen aınalysýdyń mańyzy zor. Aýyl turǵyndary men memlekettik qyzmetkerlerdiń basyn biriktirip otyrǵan búgingi sharanyń negizgi maqsaty – qysqy sport túrlerin dáripteı otyryp, eldi yntymaq-birlikke uıytý. Sondaı-aq jastardy boıyn jat áreketterden aýlaq ustap, densaýlyqtyń qadirin bilýge baýlý», dedi aýdan basshysy.
Qystyń qytymyr aıazyna qaramastan, aq qar keship arqan tartqan, dop qýalap, shanamen syrǵanap, shańǵymen jarysqan dodada top ishinen oq boıy oza shyqqan komandalar jeńimpaz atandy. Barlyq aýyldyq okrýgten jalpy sany 110 sportshy qatysqan jarys qorytyndysynda 1-oryndy Saryjaz aýylynyń, 2-oryndy Qarasaz aýylynyń, 3-oryndy Narynqol aýyldyq okrýginiń oıynshylary qanjyǵalady. Jarys jeńimpazdary men júldegerlerine arnaıy dıplomdar men medaldar tabystaldy.
Almaty oblysy