Qaterge qarsy tastúıin is

TJD mamandary tasqyn qaýpi bar 20 aýdanǵa qarasty 100 eldi mekendi baqylaýǵa aldy. Bul aýmaqtaǵy 2 myńnan astam úıde 7 658 adam turady. Basty mindet – qaýipti aımaq­ty nazarda ustap, qutqarý kúshterin der kezinde jumyldyrý. Oblystyq TJD basqarma bastyǵy, azamattyq qorǵanys polkovnıgi Aıdos Ahmetovtiń aıtýynsha, daıyndyq aıasynda óńirde toqsanǵa jýyq is-shara atqarylǵan.

– Qaýipti aýmaqtarda jalpy uzyndyǵy 53,7 shaqyrymdy quraıtyn 32 qorǵanys bógeti salyndy. Eskileri qaıta bekitilip, Tobyl ózeniniń jaǵalaýy nyǵaıtyldy. Sondaı-aq avtojoldardyń astyndaǵy 2 myńnan asa aryq pen 78 shaqyrymnan astam káriz júıesi tazartylyp, sýaǵar qubyrlar ornatyldy. Tasqyn qaýpi bar aýyldarda 39 reıd uıymdas­tyry­lyp, turǵyndarǵa túsindirý jumys­tary júrgizildi, – deıdi A.Ahmetov.

Kóktemde muz keptelisin boldyrmaý maqsatynda aldyn ala jarylys jumystaryna 209 mln teńge, áýeden baqylaý men monıtorıngke 119 mln teńge qaralǵan. 144 tonnadan astam janar-jaǵarmaı, 5,5 myń tonna ınertti materıal, 264 myń dana qumqap saqadaı saı tur.

Qazirdiń ózinde eldi mekenderden 1,3 mln tekshe metr qar shyǵarylǵan. Tótenshe jaǵdaı týyndaı qalsa, 12 myńnan astam adamdy qabyldaıtyn 111 ýaqytsha pana jumys isteıtin bolady. Bul qosyndar qajetti shatyr, tósektik orynmen tolyq qamtylǵan. Sý qursaýynda qalǵan turǵyndarǵa azyq-túlik jetkizý máselesi de nazarda. Bul baǵyttaǵy jumystardy qarjylandyrý da turaqty. Jergilikti bıliktiń tótenshe, shuǵyl shyǵyndar rezervinde 5,5 mlrd teńgeden astam qarjy qarastyrylǵan (tótenshe rezervte – 3,9 mlrd, shuǵyl shyǵyndarǵa – 1,5 mlrd teńge).

Jalpy, kóktemgi sý tasqyny kezeńinde 2 myńnan astam qutqarýshy, 415 tehnıka, 76 qaıyq, 625 motopompamen kezekshilik atqarady. Arqalyq qalasy men Jangeldın, Amangeldi, Qarasý, Áýlıekól, Naýyrzym, Sary­kól, Altynsarın aýdandaryna mobıl­di qutqarý jasaqtary aldyn ala orna­lastyrylady.