Astanadaǵy Ulttyq akademııalyq kitaphanada ádebıet synshysy Amangeldi Keńshilikulynyń «Atamura» baspasynan jaryq kórgen «Júrek sózi», «Sóz patshasy» kitaptarynyń tanystyrylymy ótti. Sonymen qatar jıynda qalamgerdiń Romen Rollannan aýdarǵan «Tolstoıdyń ómiri» kitaby da oqyrmandarǵa tanystyryldy.
Basqosýdy memleket jáne qoǵam qaıratkeri Saýytbek Abdrahmanov júrgizip otyrdy. Alǵash sóz alǵan kórnekti jazýshy Tólen Ábdik Amangeldi Keńshilikulynyń qazaq ádebıetindegi orny men shyǵarmashylyq izdenisine toqtalsa, qyrǵyz jazýshysy, TÚRKSOI uıymynyń bas hatshysy Sultan Raev onlaın júıesi arqyly avtordy jańa eńbekteriniń jaryq kórýimen quttyqtady.
«Atamura» korporasııasynyń prezıdenti Raqymǵalı Qul-Muhammed úsh kitaptyń da «Atamura» baspasynan jaryq kórgenin alǵa tartyp, kitaptardan avtordyń sóz ónerine degen talǵamy men tanym tereńdigi baıqalatynyn atap ótti. Al Ulttyq akademııalyq kitaphana dırektory Kúmis Seıitova Amangeldi Keńshilikulynyń qazaq jáne álem ádebıetin keń aýdıtorııaǵa nasıhattaý maqsatynda 2022 jyldan beri kitaphananyń «YouTube» arnasy arqyly «Ashyq ádebı leksııa» jobasyn júrgizip kele jatqanyn eske saldy.
Jıynǵa qatysýshylar qalamgerdiń «Sóz patshasy» kitabyndaǵy ádebı-syn maqalalar men «Júrek sózi» kitabyna engen esseler hám ádebı zertteýlerge jan-jaqty taldaý jasady. Jıynda Amangeldi Keńshilikulynyń kásibı synshylyq bolmysy, ádebı úderisti zerdeleýdegi tereń paıymy da sóz boldy. Sondaı-aq basqosýda álem ádebıetiniń kórnekti ókili Romen Rollannyń «Tolstoıdyń ómiri» kitabynyń qazaq tilindegi aýdarmasy da talqyǵa salynyp, tanymdy keńeıtetin tamasha tárjima degen baǵa berildi.