Aqtóbe oblysynyń Áıteke bı eskertkishi ashyldy. Bıiktigi 7 metr bolatyn Áıteke bıdiń eskertkishi Qarabutaq aýylyna kireberistegi úsh joldyń, «Batys Eýropa –Batys Qytaı» halyqaralyq kólik dáliziniń Qyzylorda baǵytyna jáne Qostanaı baǵytyna burylatyn aıryǵyna ornatylǵan.
Bul eskertkishti ornatýǵa «Qazavtojol» UK» AQ Aqtóbe oblystyq fılıalynyń dırektory Baǵlan Baımaǵambetov pen bas merdiger, «Qazavtojol» respýblıkalyq memlekettik kásiporyny Aqtóbe oblystyq fılıalynyń dırektory Ákimjan О́temuratov bastamashy boldy.
- Áıteke bı babamyzǵa 1993 jyly 350 jyldyǵy merekelengende osynda bıýsti ornatylǵan. Kókeıimizde bir ádemi eskertkish ornatý kópten beri júr edi. Sony aqyldasa kele, osy úsh joldyń aıryǵyna qoıýdy sheshtik. Jer jumystaryn aqtóbelik jolshylar óz kúshterimen atqardy, al, eskertkishi demeýshilerdiń qarjysyna jasaldy. Músinshi Aıapbergen Qarpyqovtyń qolynan shyqqan eskertkish eńseli de kórneki. Bul aqtóbelik jolshylardyń Táýelsizdiktiń 25 jyldyǵyna jasaǵan tartýy dese de bolady. Batyrlarymyzdy, handarymyzdy jáne bılerimizdi, alashtyń aıtýly tulǵalaryn este qaldyrý arqyly Táýelsizdiktiń qadir – qasıetin jastarǵa ónege –úlgi etýdiń tárbıelik máni zor, - deıdi «Qazavtojol» UK» AQ Aqtóbe oblystyq fılıalynyń dırektory Baǵlan Baımaǵambetov.
Onyń aıtýynsha, eskertkish mańaıyn kóriktendirý jáne kógaldandyrý jumystary kóktemde bastalady. Eskertkish tuǵyryna keler urpaqqa joldaý jazylǵan kapsýla salyndy. Osy jerge «Qazaqstan Respýblıkasynyń táýelsizdigine 25 jyl» dep jazylǵan stella ornatylǵan. Eskertkishti Áıteke bı aýdanynyń ákimi Málimbet Ybrashev pen eńbek ardageri, Áıteke bıdiń tikeleı urpaǵy Sársenáli Qaltaev ashty. Áıteke bı babamyzǵa as berilip, Quran baǵyshtaldy.
Satybaldy SÁÝIRBAI, «Egemen Qazaqstan».
Aqtóbe oblysy, Áıteke bı aýdany.