Búgin Aqordada Táýelsizdiktiń 25 jyldyǵy qarsańynda memlekettik syılyqtardy tabys etý sharasy bolyp ótti. Qazaqstan Prezıdenti árbir marapattyń adamdy jańa isterge shabyttandyratynyn aıtty.
"Barlyǵyńyzdy nagradalaryńyzben quttyqtaımyn, shyn júrekten quttyqtaımyn jáne sáttilik tileımin. El úlesińdi, darynyńdy atap ótip jatsa, menińshe, bul ár adamǵa qýanysh syılaıdy, biz adambyz, bizge mundaı kerek. Bul bizdi jańa belesterge rýhtandyrady, jańa isterge, jańa shyǵarmashylyq sheshimderde shabyt ashady, eńbekte de. Búgin men jumysshylardy marapattadym, bul degenińiz elimizdiń barlyq azamaty búgin-erteń ordender men medaldarmen marapattaldy degen sóz. Sonymen qatar, Táýelsizdiktiń 25 jyldyǵy arnaıy medalimen marapattalǵan barlyq qazaqstandyqty quttyqtaımyn jáne kele jatqan jarqyn mereke Táýelsizdik kúnimen quttyqtaımyn", - dedi Nazarbaev.
Aqordada Memleket basshysy QR mádenıet jáne sport mınıstri Arystanbek Muhamedıulyna, QR densaýlyq saqtaý jáne áleýmettik damý mınıstri Tamara Dúısenovaǵa, Astana ákimi Áset Isekeshevke memlekettik syılyq tabystady. Marapattalǵandardyń ishinde Memleket basshysy Qaraǵandy oblysynyń ákimi Nurmuhambet Ábdibekovti, Atyraý oblysynyń ákimi Nurlan Noǵaevty, balet ártisi Altynaı Asylmuratovany, skrıpkashy Gaýhar Myrzabekovany atap ótti.