Qazaqstan xalqy Assambleıasy tóraǵasynyń orynbasary Eraly Toǵjanovtyń oıynsha, alǵashqy kúnderden bastap ultaralyq kelisim máselesin qolǵa alýdyń arqasynda Qazaqstannyń Táýelsizdigi nyǵaıa tústi, dep xabarlaıdy QazAqparat.
"Táýelsizdik - bul eń aldymen birinshi kúnderden bastap qolǵa alynǵan beıbitshilik saıasatynyń nátıjesi. Al sol beıbitshilik saıasatynyń negizinde qoǵamdyq birlik pen kelisim jatyr. Beıbitshilik saıasaty árbir azamattyń bir-birine degen seniminen turady. Mine, osy senimniń arqasynda dostyq bolady, memlekettiń ózi nyǵaıady. Túptiń túbinde Táýelsizdigimiz kúsheıe túsedi. Sony biz alǵashqy kúnnen bastap jasaı aldyq. Elbasy ultaralyq saıasatqa, sonyń ishinde qoǵamdyq kelisim saıasatyna basa nazar aýdaryp, kún tártibiniń basty máselesi retinde belgiledi. Ol óz kezeginde áleýmettik, saıası-ekonomıkalyq, jalpy turaqtylyq máselelerin sheshýge negiz boldy. Sondyqtan bir jarym jyldyń ishinde Qazaqstanǵa 27 eldiń ókilderi kelip, ultaralyq kelisim salasynda ózara tájirıbe almasýǵa nıet bildirse, elimizdiń óskendigi, rýxymyzdyń kóterilgendigi, Týymyzdyń jelbiregendigi bolsa kerek. О́z atymnan barsha qazaqstandyqtardy Táýelsizdik kúnimen shyn júrekten quttyqtaımyn. Týymyz bıikteı bersin!" - dedi E.Toǵjanov.