Bıyl Qazaqstanda daıyn ónim eksporty artty. Bul týraly búgin QR Premer-Mınıstri Baqytjan Saǵyntaevtyń tóraǵalyǵymen ótken Úkimet otyrysynda QR Ulttyq ekonomıka mınıstri Qýandyq Bıshimbaev aıtty. Sonymen qatar mınıstr syrtqy saýda dınamıkasynda jaqsarý baıqalǵanyn baıandady. Qýandyq Bıshimbaevtyń aıtýynsha, bıylǵy jyldyń on aıy ishindegi syrtyq saýda aınalymy 49,3 mlrd. AQSh dollaryna jetti, tómendeý qarqyny 2016 jylǵy birinshi jartyjyldyqtaǵy 30,4% salystyrǵanda 24,4% baıaýlady. Eksport 29,1 mlrd. AQSh dollaryn, ımport – 20,2 mlrd. AQSh doll. qurady.
Syrtqy saýda teńgeriminiń oń kórsetkishi 8,9 mlrd. dollardy qurady. Daıyn ónim eksportynyń ósimi jaǵymdy fakti boldy. Máselen, qańtar-qarasha aılarynda 2015 jyldyń 11 aıymen salystyrǵanda daıyn ónim eksporty 6,9% , 509,8 mln. AQSh dollarynan 544,9 AQSh dollaryna deıin ósti. Al qorytyndy eksporttaǵy daıyn ónim úlesi 1,3%-dan 1,6%-ǵa deıin artty.
Esterińizge sala ketsek, búgin Úkimet otyrysynda 2016 jyldyń 11 aıynyń qorytyndysy boıynsha Qazaqstandaǵy syrtqy saýdanyń negizgi parametrleri talqylandy. Bıyl barlyq damýshy elder, onyń ishinde Qazaqstan da álemdik ekonomıkadaǵy birqatar eleýli qaterlermen jáne kóptegen syrtqy qaterlermen betpe-bet keldi. Buǵan qaramastan, daǵdarysqa qarsy jáne memlekettik baǵdarlamalardy júzege asyrý esebinen Qazaqstan ekonomıkasynda ósimniń oń betalysy qamtamasyz etildi.
Arnur Asqar, "Egemen Qazaqstan".