El Táýelsizdiginiń 25 jyldyǵyna baılanysty Qazaqstannyń 25 jazýshysynyń táýelsizdik jyldary jazǵan shyǵarmalary túrik tiline aýdarylyp, jaryq kórdi, dep habarlaıdy QazAqparat.
Búgin QR Ulttyq kitaphanasynda «Ata jurttan áńgimeler - Qazaqstan. Muńdas býyn» dep atalatyn túrik tilindegi kitaptyń resmı tusaý keser rásimi ótti. Atalǵan kitaptyń shyǵýyna QR Túrkııadaǵy Elshiligi, «Túrksoı» jáne Túrkııadaǵy Eýrazııa kitaphanashylar qaýymdastyǵy qoldaý kórsetken.
Búgingi tusaýkeser sharasyna Eýrazııa kitaphanashylar qaýymdastyǵynyń tóraǵasy Mustafa Chalyshkan arnaıy keldi. «Bul kitap bıyl Túrkııada jaryq kórip, Ankara qalasynda tusaýy kesildi. Muńdas, syrlas býyn desek bolady qazaqsha, bul zamanmen syrlas degen uǵym beredi. Barlyq áńgimeler arqyly qandas, baýyrlas, el jurttyń ómirin tanydyq. Qazaqstannyń 25 jyldyǵyna Eýrazııa kitaphanashylar qaýymdastyǵy atynan osy kitapty syıǵa tartý etip otyrmyz. Eki memlekettiń qarym-qatynasy nyǵaıýy úshin qolymyzdan kelgenin jasaımyz. Ankarada ótken tusaýkeserde túrik aqyn-jazýshylary kitapqa oń baǵasyn berdi. Oqyrman retinde ózim de oqyp shyqtym. Oqı otyryp, Túrkııanyń aýylyndaǵy taǵdyrmen uqsastyqty kórgendeı boldyq. Túrkııada áńgimege arqaý bolǵan taqyryptardy da qazaq qalamgerlerli qozǵaǵan eken», dedi Mustafa Chalyshkan.
Aıta keteıik, qazaq qalamgerleriniń shyǵarmalaryn túrik tiline aýdaryp, jınaqty qurastyrǵan - aýdarmashy, pýblısıst, Qazaqstan Jazýshylar odaǵynyń múshesi, Halyqaralyq «Túrksoı» uıymynyń ókili Málik Otarbaev. Jınaqqa Berik Shahanov, Marhabat Baıǵut, Smaǵul Elýbaı, Nesipbek Dáýitaıuly, Naǵashybek Qapalbekuly, Dıdahmet Áshimhanuly, Nurdaýlet Aqysh, Jumabaı Shashtaıuly, Turysbek Sáýketaı, Ertaı Aıǵalıuly, Qýandyq Túmenbaı, Raqymjan Otarbaev, Maqsot Izimuly, Kósemáli Sáttibaev, Qalı Sársenbaı, Sábıt Dúsenbıev, Serikqalı Hasan, Nurǵalı Oraz, Janabek Shaǵataı, Asqar Altaı, Roza Muqanova, Aıgúl Kemelbaeva, Serik Nuǵyman, Gúlzat Shoıbekova jáne Málik Otarbaevtyń áńgimeleri engizildi. Búgingi sharaǵa Almatydaǵy Túrkııa Respýblıkasy Bas konsýldyǵy ókilderi, aqyn-jazýshylar, qoǵam qaıratkerleri qatysty.