Qazaqstan Respýblıkasynyń Syrtqy ister mınıstrligi Reseıdiń Túrkııadaǵy elshisi Andreı Karlovtyń óltirilýine baılanysty málimdeme jasady. Málimdemede bylaı delinedi:
«Qazaqstan Respýblıkasynyń Syrtqy ister mınıstrligi Ankarada bolǵan Reseı Federasııasynyń Túrik Respýblıkasyndaǵy Tótenshe jáne ókiletti elshisi Andreı Karlovtyń óltirilýi oqıǵasyn sheshimdi túrde aıyptaıdy.
Egemen eldiń ókiletti ókiline qarsy baǵyttalǵan terrorızmniń atalǵan aktisi Túrkııa men Reseı arasyndaǵy qarym-qatynasqa syzat túsirip, úreı týǵyzýdy kózdeıdi».
Málimdemede, sonymen qatar, Reseı tarapyna, marqumnyń otbasy men jaqyndaryna kóńil aıtylyp, atalǵan jaýyzdyq aktisiniń eshqandaı da aqtaýǵa jatpaıtyny atap kórsetiledi jáne Túrkııanyń quqyq qorǵaý organdary tarapynan egjeı-tegjeıli tekserilip, ony uıymdastyrýshylardyń qatań jazalanatynyna úmit bildiriledi.