Mańǵystaý aýdanynda «Shóltóbe-Ushtaǵan-Basqudyq-Jarma» gaz qubyry iske qosylyp, Ushtaǵan, Basqudyq jáne Jarma aýyl turǵyndarynyń úıinde kógildir otyn paıda boldy, dep habarlaıdy oblys ákiminiń baspasóz qyzmeti.
Gaz qubyrynyń jalpy uzyndyǵy – 92,67 shaqyrymdy quraıdy. «Samuryq Qazyna» Ulttyq ál-aýqat qorynan atalmysh gaz qubyryna 898 576 000 teńge qarajat bólingen.
«Búginde aýdandaǵy áleýmettik máseleler tolyqqa jýyq sheshildi deýge bolady. Barlyq aýyldarda bala-baqshalar jumys jasaıdy. Sońǵy jyldary aýdannyń jeti eldi mekeninde jańa dárigerlik ambýlatorııalar iske qosyldy, barlyq aýyldarda avtomobıl joldary jańartylyp, jaıaý júrginshiler joly salyndy. Aldaǵy jyldary da el qajettiligine qaraı áleýmettik nysandar salyna beretin bolady. Mine, búgin Mańǵystaý aýdanynyń kishkentaı eki aýylyna gaz keldi. Sizderdi osy qýanyshtaryńyzben shyn júrekten quttyqtaımyn. Úılerińizden jylý ketpesin!» – dedi Mańǵystaý oblysynyń ákimi Alık Aıdarbaev.