«Damý» kásipkerlikti damytý Qory» AQ-nyń Astana qalasy boıynsha aımaqtyq fılıaly respýblıkalyq jáne jergilikti BAQ ókilderine press-týr uıymdastyrdy. Onyń aıasynda "Bıznestiń jol kartasy – 2020" baǵdarlamasy arqyly qoldaý alǵan kásiporyndardyń jumysy tanystyryldy.
Solardyń biri - jeke kásipker Jangúl Telbaevanyń aıaq kıim shyǵaratyn kásiporny. Jeke kásipker óziniń óndirisine qajetti qural-jabdyqtardy satyp alý úshin «Damý» qorynan keńes alyp, memelekettik baǵdarlamaǵa qatysýǵa ótinish bildirgen. Nesıe alý barysynda «Damý» qory bankke kepildik bergen. Sóıtip, basynda aıaq kıimdi shetelden tasyp júrgen jeke kásipker 430 myń teńge sýbsıdııa alǵan. Sonymen qatar "Bıznestiń jol kartasy – 2020" memlekettik baǵdarlamasymen «Sberbankten» alǵan nesıesiniń jyldyq paıyzdyq mólsherlemesi 4%-ǵa deıin tómendetilgen. Búginde J.Telbaeva erler men áıelderge arnalǵan aıaq kıimder shyǵarýmen aınalysady. Seh ónimderine qoldanylyp jatqan shıkizat ta otandyq ónim. Ol bylǵaryny Almaty qalasynan, júndi Kókshetaýdan aldyrady. Kásipker endi Begim-Sulu Fashion Shoes aıaq kıim brendin tirkeýdi josparlap júr.
Al, «Iývelırnaıa kompanııa Kazyna Gold» JShS áshekeı buıymdaryn shyǵarý sehy 1994 jyldan jumys istep keledi. Ákeden balaǵa mura bolǵan áýlettik kásiporynnyń zergerlik zattaryna suranys joǵary. Munda klassıkalyq úlgidegi áshekeı ónimderi zergerliktiń qatań qaǵıdalarymen jasalady. 2014 jyldyń sáýir aıynan bastap, «KAZYNA GOLD» brendi boıynsha jańashyldyqpen otbasylyq dástúrdi saqtaı otyryp, zamanaýı etno-stıldi buıymdar shyǵarýda. Kásiporyn óndiriste tek otandyq shıkizatty qoldanyp otyr.
Kásiporyn «Bıznestiń jol kartasy – 2020» memlekettik baǵdarlamasyna qatysyp, «Sesnabankten» alǵan nesıesiniń jyldyq paıyzdyq mólsherlemesin tómendetýge qol jetkizdi. Sol arqyly óndiriske qajetti materıaldardy satyp aldy. «Damý» qorynyń aralasýymen atalǵan jobaǵa 698 myń teńge sýbsıdııa berildi.
bir aıta keterligi, 2010 jyldan bastap «Damý» qory «Bıznestiń jol kartasy – 2020» baǵdarlamasynyń qarjy agenttigi retinde, baǵdarlamany belsendi túrde júzege asyryp keledi. Alty jylda 7 myńnan astam qazaqstandyq kásipker sýbsıdııa alyp, kepildik retinde memlekettik kómekke qol jetkizdi. Olarǵa tólengen sýbsıdııa mólsheri – 138 967 mln. teńge. Astana qalasynda atalǵan memlekettik kómekti 500-den astam kásiporyn alyp otyr.
Jyl basynan beri Astana qalasynda nesıeniń barlyq somasy 20 200 mln.teńgeni quraıtyn 71 sýbsıdııa kelisimshartyna qol qoıyldy. Kepildik boıynsha 62 joba maquldandy. Qol qoıylǵan kepildik kelisimsharttarynyń quny 866 mln.teńgeni quraıdy. Kásipkerge 2 640 mln teńge sýbsıdııa tólendi.
Asylbek Dosaly