Astana qalasy ákiminiń birinshi orynbasary Sergeı Horoshýn elordanyń temirjol vokzaly mańyndaǵy aqyly turaqtyń aqysyna qatysty pikir bildirdi, dep habarlaıdy QazAqparat.
«Menińshe, bul proseske qatysýshylardyń barlyǵyna jaıly jaǵdaı jasaý qajet. О́ıtkeni, qazirgi ýaqytta ózderińiz de kórip otyrǵandaı, bul turaqtarda kólikter táýliktep, aılap turady. Al jolaýshylar bolsa ol jerlerden óte almaı áýrege túsedi. Sondyqtan bul ereje barlyǵyna birdeı mindetti bolady», - dedi Horoshýn BAQ ókilderiniń «Turaqqa 200 teńge tóleý tym qymbat emes pe?» degen saýalyna oraı.
Esterińizge sala ketsek, taıaýda Astana qalasynyń ákimi Áset Isekeshev elordanyń temirjol vokzalynyń mańyndaǵy jaǵdaıdy tekserdi. Sol kezde temirjol vokzaly men «Saparjaı» basshylary ákimge aqyly avtoturaq júıesi áýejaı mańyndaǵy avtoturaq sııaqty jumys isteıtin bolatyndyǵyn aıtqan edi. Bul jerde de bastapqy 20 mınýty tegin bolsa, keıin ár saǵaty úshin 200 teńge alynady. Tegin oryndar akkredıtasııadan ótken taksı júrgizýshilerine ǵana beriledi. Al, «Saparjaı» avtovokzalymen yntymaqtastyqqa kelmegen taksı júrgizýshilerine tegin oryndar berilmeıdi. Bul taksı júrgizýshileri kóbine Astana-Pavlodar, Astana -Qaraǵandy, Astana-Kókshetaý baǵyttarynda jolaýshy tasymaldap keledi. Eger olar akkredıtasııadan ótpese, basqa avtokólik ıeleri sııaqty aqsha tóleıtin bolady.