2025 jyldyń qorytyndysy boıynsha Qazaqstan IT-qyzmetter eksporty boıynsha strategııalyq mańyzdy kórsetkishke qol jetkizdi. Ulttyq banktiń derekterine sáıkes, otandyq sıfrlyq ónimder men qyzmetterdiń eksporty 1,142 mlrd dollardy qurady. Bul eldiń tehnologııalyq qyzmetter boıynsha taza eksporttaýshyǵa aınalǵanyn kórsetedi, dep habarlaıdy Egemen.kz.
Sarapshylardyń aıtýynsha, qazirgi tańda IT-eksport kólemi ımportqa jumsalǵan shyǵynnan 2,6 ese joǵary. Bul Qazaqstannyń sıfrlyq ekojúıesi turaqty túrde damyp kele jatqanyn aıǵaqtaıdy.
Ulttyq banktiń málimeti boıynsha, qazaqstandyq IT-sheshimder álemniń 110-nan astam elinde qoldanylady. Negizgi maqsat – otandyq ınnovasııalardy jahandyq sıfrlyq naryqqa shyǵarý jáne halyqaralyq qosylǵan qun tizbegine ıntegrasııalaý.
«Qazaq Digital Mektebi»: Qala men aýyl mektepteri arasyndaǵy alshaqtyq joıyla ma?
Sıfrlyq damý salasyndaǵy basty draıverlerdiń biri – Astana Hub. Onyń rezıdent kompanııalarynyń eksporttyq tabysy 633 mln dollarǵa jetken. Qazirgi tańda 537 kompanııa shetel naryǵynda jumys istep, olardyń geografııasy Germanııa, Ispanııa, Nıderlandy jáne BAÁ elderin qamtıdy. Ekojúıede 32,5 myńnan astam jumys orny qurylǵan.
Sonymen qatar e-residency jobasy arqyly 6 myńnan astam sheteldik maman Qazaqstannyń sıfrlyq ınfraqurylymyna qol jetkizgen.
Jasandy ıntellekt jáne sıfrlyq damý mınıstrligi ókilderiniń aıtýynsha, 1 mlrd dollarlyq mejege jetý – júıeli memlekettik qoldaý men ekojúıelik damýdyń nátıjesi.
Qazaqstannyń jahandyq tehnologııalyq yqpaly halyqaralyq habtar arqyly da keńeıýde. Palo-Alto, Shanhaı jáne Dýbaıda ınnovasııalyq alańdar jumys isteıdi. Sonymen qatar Ońtústik-Shyǵys Azııa baǵyty da jańa basymdyqqa aınalýda.