Búgin Qaraǵandy oblysy ákiminiń tapsyrmasyna saı, óńir basshysynyń orynbasary Andreı Lıapýnov Temirtaý qalasynyń jylý maýsymyna daıyndyq barysy kóterilgen keńes ótkizdi, dep habarlady oblys ákiminiń baspasóz qyzmeti.
JES-2 jumysynda aqaýlardyń oryn alýyna baılanysty metallýrgter qalasynyń turǵyndaryna jylý durys berilmeı keldi.
«Sizder Úkimet tóraǵasy tarapynan syn aıtylǵanyn bilesizder. Osydan eki kún buryn oblys ákimi stansııany aralap, naqty tapsyrmalar bergen bolatyn. Olardyń oryndalýy merzimi búgin, ıaǵnı 30 jeltoqsan kúni aıaqtaldy. Aımaq basshysynyń tapsyrmasy oıdaǵydaı oryndalǵanyna kýá bolyp otyrmyz. Qazir temirtaýlyqtardyń úıleri jylynǵan, 4 qazandyq jumys istep tur, rezervte taǵy eki qazandyq bar. Qazirgi tańda jylý berý qalypqa túsken», – dedi A.Lıapýnov.
Osydan soń «ArselorMıttal Temirtaý» AQ jóndeý jumystary jónindegi dırektorynyń, jylýmen qamtý uıymy dırektorynyń jáne qala ákimdiginiń Temirtaý qalasyndaǵy jylý maýsymyn ótkerý jónindegi esepteri tyńdaldy.
JES-2-de 4 jylytý qazandyǵy (№3,4,5,6) jumys isteýde, al 2 qazandyq rezervte. Syrttaǵy aýa temperatýrasyna sáıkes stansııadaǵy temperatýra rejımi 80/500 S grafıgi boıynsha jumys isteıdi. №1 qazandyq jumys istep tur. Rejımdik kartaǵa sáıkes 31 jeltoqsan kúni qosymsha jumys isteýge qajetti jylýmehanıkalyq parametrlerdi qalyptastyrý bastalǵan. Qazirgi tańda býdyń qysymy 45 ks*s/sm2 qurap otyr, temperatýra - 250 0S.
«Jylytý maýsymyn oıdaǵyndaı ótkerý bizdiń basty mindetimiz. Temirtaý qalasynyń 90 % turǵyny jylýdy JES-2-den alady. Alda merekelik kúnder kele jatyr. Sondyqtan da qala turǵyndary kommýnaldyq qyzmettiń barlyq túrimen tolyq qamtylýy kerek. Aımaq turǵyndaryn sapaly jylýymen qamtamasyz etý – jylýmen qamtý mekemeleriniń quzyrynda», – dep atap ótti oblys ákiminiń orynbasary.
Qazirgi tańda Temirtaý qalasynyń turǵyndary tarapynan jylýdyń joqtyǵyna shaǵymdanýshylar joq. Oblys ákimdiginiń baspasóz qyzmeti BAQ ókilderimen birge 80 kóp páterli turǵyn úılerdi aralap, 50-ge tarta otbasymen kezdezti, turǵyndar arasyna saýalnama júrgizdi. Basty saýal «Úılerińiz jyly ma?». Turǵyndardyń aıtýynsha páter temperatýrasy qalypqa kelip, 24-29 gradýsty kórsetip tur.
«Bizde sońǵy úsh kúnde jylý qalypty berilýde. Buǵan deıin múldem jylý bolmaǵan. Batareıalar tastaı sýyq boldy, bólme temperatýrasy 13 gradýsqa deıin tómendep ketti. Al qazir mine, ózderińiz de kórip turǵandaryńyzdaı 22-24 gradýs», – deıdi qala turǵyny Tatıana Sadvakasova.
Qala turǵyndaryn jylýmen qamtamasyz etý bekitilgen parametrler boıynsha júzege asýda. Jalpy alǵanda qalany jylýmen qamtamasyz etý shtattyq rejımde júzege asyrylýda.
Qaırat ÁBILDINOV,
«Egemen Qazaqstan»